Հարավային Կորեայի իշխանությունները ձերբակալել են «Սևոլ» լաստանավի գործարկու ընկերության ղեկավարին

Հարավային Կորեայի դատախազությունը մայիսի 8-ին ձերբակալել է խորտակված «Սևոլ» լաստանավի գործարկու ընկերության ղեկավարին: Դա արվել է ողբերգության հետաքննության ընդլայնվող մասշտաբների շրջանակներում:

Դատախազության և ոստիկանության աշխատակիցների համատեղ խմբի ներկայացուցիչները հայտնել են, որ Chonghaejin Marine ընկերության նախագահ Կիմ Հան Սիկը ձերբակալվել է Սեուլի Պունդան արվարձանում գտնվող իր տանը և ենթարկվել հարցաքննության: «Նրան առաջադրվել են մի ամբողջ շարք մեղադրանքներ, ներառյալ ոչ կանխամտածված սպանությունը և նավագնացության անվտանգության մասին օրենքի խախտումը»,- նշել է միացյալ խմբի պաշտոնական ներկայացուցիչը:

6825 տոննա ջրատարողությամբ «Սևոլ» լաստանավը ապրիլի 16-ին խորտակվել է Դեղին ծովում՝ Կորեական թերակղզու հարավարևմտյան ափերի մոտ: Նավում եղած 476 ուղևորներից ու անձնակազմի անդամներից փրկվել է 172 մարդ, 269-ը զոհվել են, ևս 35 մարդ անհայտ կորած են համարվում, հաղորդել է ԻՏԱՌ-ՏԱՍՍ գործակալությունը: