Բուրքհալտերը հայտնել է Ուկրաինայի վերաբերյալ «ճանապարհային քարտեզի» իրականացմանն անցնելու մասին

Ինչպես հայտնում է ria.ru-ն, ԵԱՀԿ-ի գործող նախագահ, Շվեյցարիայի նախագահ և արտաքին գործերի նախարար Դիդիե Բուրքհալտերը հայտարարել է, որ Ուկրաինայի վերաբերյալ իր առաջարկած «ճանապարհային քարտեզն» աջակցություն է ստացել, և ինքը ձեռնամուխ է եղել դրա իրագործմանը: Այդ մասին ասված է ԵԱՀԿ-ի հայտարարության մեջ:

Բուրքհալտերը հավաստել է, որ «դրական արձագանքներ» է ստացել Ուկրաինայից, Ռուսաստանից, ԱՄՆ-ից և Եվրամիությունից: Ելնելով դրանից՝ նա ձեռնամուխ է եղել «ճանապարհային քարտեզի» իրագործմանը, նշվում է հայտարարության մեջ:

Բուրկհալտերը, մայիսի 6-ին ելույթ ունենալով Վիեննայում, Ուկրաինայի վերաբերյալ «ճանապարհային քարտեզ» է առաջարկել մինչև մայիսի 25-ի ընտրություններն ընկած ժամանակաշրջանի համար: ԵԱՀԿ-ի ղեկավարի առաջարկությամբ միջազգային հանրակցությունը պետք է աջակցի նախագահական այդ ընտրությունների, ինչպես նաև դրանց հետ միաժամանակ իշխանության ապակենտրոնացման վերաբերյալ կոնսուլտատիվ ազգային հարցման անցկացմանը:

Նախօրյակին Դիդյե Բուրկհալտերը հայտնել էր, որ Ուկրաինայի իշխանություններն ընդունել են գերմանացի դիվանագետ Վոլֆգանգ Իշինգերին ԵԱՀԿ-ից ներուկրաինական երկխոսության մոդերատոր նշանակելու վերաբերյալ ԵԱՀԿ-ի առաջարկությունը:

«Ես ուրախ եմ ձեզ տեղեկացնելու, որ Ուկրաինայի կառավարությունն ընդունել է դեսպան Վոլֆգանգ Իշինգերին որպես ԵԱՀԿ-ից այդ կլոր սեղանների համամոդերատոր նշանակելու վերաբերյալ մեր առաջարկությունը»,-ասված է շվեյցարական կառավարության ինտերնետ-կայքում հրապարակված հայտարարության տեքստում: