Վերսկսվել է որոնողական գործողությունը խորտակված «Սևոլ» լաստանավում

Մայիսի 13-ին վերսկսվել է որոնողական գործողությունը Հարավային Կորեայում խորտակված «Սեւոլ» մարդատար լաստանավում, որն ընդհատվել էր անբարենպաստ եղանակային պայմանների պատճառով: Այդ մասին հաղորդել է Agence France-Presse-ը՝ հղում անելով առափնյա պահպանության ներկայացուցչին:

Որոնումներն ուժգին քամու և ալեկոծության պատճառով դադարեցվել էին մայիսի 10-ի առավոտյան:

Ինչպես լրագրողներին հայտնել է առափնյա պահպանության ներկայացուցիչ Քո Մյուն-Սուկը, այսօր եղանակային պայմանները լավացել են, ինչը թույլ է տվել ջրասուզակներին վերսկսել աշխատանքները: Այդուամենայնիվ, նոր որոնումների ընթացքում փրկարարները զոհվածների մարմիններ չեն հայտնաբերել:

«Սևոլ» մարդատար լաստանավը, որտեղ եղել է 476 մարդ, նավաբեկության է ենթարկվել ապրիլի 16-ին Հարավային Կորեայի հարավարևմտյան ափի մոտ: Հաջողվել է փրկել 172 մարդու, զոհվածների թիվը հասնում է 275-ի: Նավի ևս 29 ուղևորի ճակատագիրը մինչ օրս պաշտոնապես մնում է անհայտ: Նավի խորտակման գործով կալանավորվել է շուրջ 20 մարդ դրա սեփականատերը հանդիսացող «Չոնհեչժին» ընկերության աշխատակիցների, նավի անձնակազմի և Կորեայի նավագնացության ասոցիացիայի անդամների թվից՝ անվտանգության կանոնների խախտման և կոռուպցիայի կասկածանքով: