ԱՄՆ-ը Նիգերիայում հետախուզական ինքնաթիռ է գործի դրել առևանգված աղջիկներին հայտնաբերելու համար

ԱՄՆ-ն Նիգերիայում օդաչուավոր հետախուզական ինքնաթիռ է գործի է դրել դպրոցական աղջիկներին հայտնաբերելու համար, որոնց ապրիլին առևանգել են «Բոկո Հարամ» խմբավորման ծայրահեղականները: Այդ մասին լրագրողներին հայտնել է ամերիկյան վարչակազմի ներկայացուցիչը:

«Մենք նիգերցիներին տրամադրում ենք առևտրային արբանյակներից արված նկարահանումները և Նիգերիայում օդաչուավոր հետախուզական ինքնաթիռ ենք օգտագործում կառավարության թույլտվությամբ»,- ասել է նա:

Պենտագոնի ներկայացուցիչներն ավելի վաղ հայտնել էին մի ոչ մեծ խումբ ամերիկացի զինվորականներ Նիգերիա ուղարկելու մասին: Զինվորականները հիմնականում պատասխանատու են լինելու կապի ապահովման, թիկունքային աջակցության և հետախուզման պլանավորման համար:

Ավելի վաղ նախագահ Օբաման խոստացել էր ոչ միայն օգնել Նիգերիայի իշխանություններին ազատելու պատանդ վերցված ավելի քան 270 դպրոցական աղջիկներին, այլև այդ երկրի կառավարությանն աջակցություն ցուցաբերել նրանց առևանգած «Բոկո Հարամ» արմատական խմբավորման, ինչպես նաև նմանօրինակ այլ կազմակերպությունների դեմ մղվող պայքարում:

Ապրիլի 14-ին «Բոկո Հարամ» խմբավորման ահաբեկիչները Նիգերիայի հյուսիս-արևելքի Չիբոկ բնակավայրի վարժարանից պատանդ են վերցրել 276 դպրոցական աղջիկների: Ոստիկանության տվյալներով՝ 53 դեռահասներ կարողացել են փախչել, 223-ը մինչ այժմ մնում են ելուզակների ձեռքում: Ուսումնական հաստատության վրա հարձակումը «Բոկո Հարամը» բացատրում է այն բանով, որ «արևմտյան կրթությունը պետք է դադարեցվի, իսկ աղջիկները պետք է թողնեն դպրոցը և մարդու գնան», հաղորդել է ԻՏԱՌ-ՏԱՍՍ-ը: