Թուրքիայի արտգործնախարարը քննադատել է ՄԻԵԴ-ի որոշումը

Թուրքիայի արտաքին գործերի նախարար Ահմեդ Դավութօղլուն արձագանքել է Մարդու իրավունքների եվրոպական դատարանի կայացրած որոշմանը, որով Անկարան պարտավոր է 90 մլն եվրո փոխհատուցում վճարել կիպրահույներին: Այս մասին տեղեկացնում է թուրքական Demokrathaber.net-ը:

Թուրքիայի արտգործնախարարը հայտնել է, որ իրենք չեն ընդունում ՄԻԵԴ կայացրած որոշումը, հետևաբար, նաև չեն վճարելու նախատեսված փոխհատուցումը: Ավելի վաղ եվրոպական դատարանի որոշումը քննադատող հայտարարություն էր տարածել Թուրքիայի արտաքին գործերի նախարարությունը:

Մարդու իրավունքների եվրոպական դատարանը (ՄԻԵԴ), որտեղ մայիսի 12-ին լսվում էր 1974թ. Թուրքիայի կողմից Կիպրոսի Հանրապետության տարածքի մեկ երրորդ մասը բռնազավթելու հարցը, Անկարային պարտադրել է 90 մլն եվրո փոխհատուցում վճարել կիպրահույներին: Այդ գումարի 30 մլն եվրո մասը պետք է ուղղվի բռնազավթման ռազմական գործողությունների ժամանակ անհայտ կորած ընտանիքների բարոյական վնասի փոխհատուցմանը, իսկ 60 մլն եվրոն պետք է փոխանցվի կղզու թուրքական մասում' Քարփազ թերակղզում բնակվող հույներին: 1974թ. ռազմական գործողությունների ժամանակ Կիպրոսում անհայտ կորել է 1491 հույն քաղաքացի, 211 հույն քաղաքացի էլ տեղահանվել է:

Կիպրոսի Հանրապետությունը 1974 թ. բռնազավթման համար Թուրքիայի դեմ փոխհատուցման հայց վերջին անգամ ներկայացրել էր 1994 թ. նոյեմբերի 22-ին: Այսպիսով, Թուրքիան պատմության ընթացքում առաջին անգամ կանգնել է ուրիշի տարածքը բռնազավթելու համար փոխհատուցում կատարելու փաստի առաջ: Կիպրոսի Հանրապետությունը Թուրքիայի դեմ կղզու մի մասի բռնազավթման հարցով երեք միջպետական դատական գործ էր բացել նաև 1974, 1975 և 1977 թվականներին, սակայն այդ դատական գործերն ավա րտվել էին առանց փոխհատուցման վճիռների: