ԱՄՆ-ն, ՌԴ-ն և ԳՖՀ-ն փորձում են Ուկրաինայում միասին առաջ մղել ազգային երկխոսությունը. Քերի

ԱՄՆ-ն, Ռուսաստանը և Գերմանիան շփվում են, որպեսզի համատեղ Ուկրաինայում առաջ մղեն ազգային երկխոսությունը: Այդ մասին հայտարարել է ԱՄՆ-ի պետքարտուղար Ջոն Քերին:

«Քաղաքական ճանապարհով հակասությունների լուծման տանող ճանապարհին հանգուցային քայլն Ուկրաինայի կողմից կազմակերպված և ԵԱՀԿ-ի աջակցությունն ստացած ազգային երկխոսությունն է և կլոր սեղանները, որոնք պետք է անցկացվեն ամբողջ Ուկրաինայում: Դրանց ուշադրության կենտրոնում կլինեն իշխանության ապակենտրոնացումն ու սահմանադրական բարեփոխումը»,- ասել է Քերին:

«Մենք շփվում ենք ԵԱՀԿ-ի, ԳՖՀ-ի ԱԳ նախարար Շտայնմայերի և ՌԴ ԱԳՆ-ի ղեկավար Լավրովի հետ: Փորձում ենք հասնել այն բանին, որ այդ գործընթացը հաստատվի ըստ կարելվույն ամբողջական ու արագ»,- հավելել է Քերին: Նա նաև ողջունել է Վալտեր Իշինգերի նշանակումը ներուկրաինական երկխոսության համակարգող:

Քերին դարձյալ քննադատել է Դոնեցկի և Լուգանսկի մարզերում կազմակերպված հանրաքվեները և աջակցություն է հայտնել մայիսի 25-ին Ուկրաինայում նախագահական ընտրությունների անցկացմանը: Նա նաև հայտարարել է, թե Ռուսաստանն իբր ղեկավարել է հանրաքվեների անցկացումը, չնայած ՌԴ-ի նախագահ Վլադիմիր Պուտինի հրապարակային հայտարարությանը, որը կոչ է արել հետաձգել քվեարկությունը:

Ուկրաինայի խորհրդարանի մամուլի ծառայությունը նախօրյակին հաղորդել է, որ համաուկրաինական «ազգային միասնության կլոր սեղանի» առաջին նիստը տեղի կունենա մայիսի 14-ին, Գերագույն ռադայում: Միջոցառմանը հրավիրված են Ուկրաինայի նախկին նախագահներ Լեոնիդ Կրավչուկը, Լեոնիդ Կուչման, վարչապետ Արսենի Յացենյուկը և կառավարության անդամներ, ժողովրդական պատգամավորներ, նախագահի թեկնածուներ, մարզային վարչակազմերի ղեկավարներ և մարզային խորհուրդների նախագահներ, տեղական ինքնակառավարման մարմինների ներկայացուցիչներ, գիտնականներ, կրոնական կազմակերպությունների, գործարար շրջանների, հասարակական ու միջազգային կազմակերպությունների ներկայացուցիչներ, հասարակական գործիչներ:

Ուկրաինայի ընդվզած հարավ-արևելքի ներկայացուցիչների մասնակցության մասին մամուլի ծառայության հաղորդագրության մեջ չի հիշատակվում:

«Կլոր սեղաններ» անցկացնելու նախաձեռնությամբ մայիսի 8-ին հանդես են եկել Ուկրաինայի նախագահի պաշտոնակատար, Գերագույն ռադայի խոսնակ Ալեքսանդր Տուրչինովը և վարչապետ Յացենյուկը: «Մենք պատրաստ ենք զրուցել բոլոր նրանց հետ, ովքեր ունեն օրինական քաղաքական նպատակներ և պատրաստ են դրանք պաշտպանել օրինական միջոցներով, նրանց հետ, ովքեր արյուն չեն հեղել: Մենք բոլոր տարածաշրջանների բոլոր քաղաքական ուժերի, քաղաքացիական հասարակության, գիտական շրջանների ներկայացուցիչներին հրավիրում ենք երկխոսել բոլոր այն հարցերի ու խնդիրների շուրջ, որոնք այժմ ծառացած են ուկրաինական ժողովրդի առջև»,- ասված է նրանց համատեղ ուղերձում:

Երկխոսության նպատակն ուկրաինական հասարակության արմատական խնդիրների շուրջ փոխհամաձայնության հասնելն է, հաղորդել է ՌԻԱ Նովոստին: