Ադրբեջանական ԶԼՄ-ները վայնասուն են բարձրացրել Արցախյան պատերազմի մասին պատմող ֆիլմերի պատճառով, որոնք ներկայացվել են Կաննի կինոշուկայում

Ռեժիսոր Ջիվան Ավետիսյանն իր նոր` «Վերջին բնակիչը» ֆիլմի նախագիծը ներկայացրել է Կաննի 67-րդ փառատոնի կինոշուկայում: Ռեժիսորը նախագիծը ոչ միայն հայկական տաղավարում է ներկայացրել, այլ նաև օգտվել է ռուսական «Ռոսկինո»-ի տաղավարից` բավարարելով մրցութային պահանջները: Այս քայլը ադրբեջանական լրատվամիջոցներում վայնասունի առիթ է հանդիսացել: Մի հոդվածում «Ռուսաստանը հայերին օգնել է Կաննում հակաադրբեջանական ֆիլմ ցուցադրել» գլխագրով հոդվածագիրը գրել է. «Էլ ինչ հեղինակավոր փառատոն, ինչպիսին Կանն է, առանց ճարպիկ հայերի»։ 

Lurer.com-ի թղթակցի հետ զրույցում ռեժիսորը պատմեց ինչպես իր երկրորդ ֆիլմի` «Թևանիկ»-ի մասին, որն, իմիջիայլոց, այս օրերին ցուցադրվում է Մոսկվա կինոթատրոնում, այնպես էլ նոր նախագծի`«Վերջին բնակիչը» ֆիլմի մասին:

Այս ֆիլմը, ինչպես ռեժիսորի նախորդ երկու ֆիլմերը, ևս կպատմի արցախյան ազատամարտի մասին` լինելով յուրօրինակ և չկրկնելով նախորդ երկուսը:

«Մի քանի քայլ առաջ կլինի, ունենալու ենք նախանձելի դերասանական կազմ, բայց դեռևս անուններ չեմ ուզում տալ», - ասում է Ջիվան Ավետիսյանը` խոսելով «Վերջին բնակիչը» ֆիլմի նախագծի մասին և կարևորում իր մասնակցությունն այնպիսի հեղինակավոր փառատոնին, ինչպիսին Կանն է.

«Ֆիլմը կարողանում ես Հայաստանի սահմաններից դուրս հանել, ներկայացնել փառատոնի ներկայացուցիչներին, դիստրիբուտներին, նաև հետագա պրոյեկտի համար պրոդյուսերիների, ֆիլմարտադրողների հետ ես կարողանում պայմանավորվածություններ ձեռք բերել: Իհարկե այդ ամենը մեծ ռեսուրս է պահանջում: Հազարավոր նամակներ ենք ուղարկել, բայց որպես կանոն` նամակներիդ արձագանքում է հարյուրից մեկը: Արդյունքերի մասին վաղ է խոսել. պետք է քննարկեն և որոշում կայացնեն` ֆիլմը մրցույթին մասնակցու է, թե` ոչ: Մենք փորձում ենք նոր պրոյեկտի համար արտերկրում ֆինանսական աջակցություն գտնել: Ազգային կինոկենտրոնի կողմից խոստում ունենք, բայց, ցավոք սրտի, նրանք չեն կարող հոգալ ողջ ծախսը, և ինչպես «Թևանիկի» պարագայում, (անցած տարի կարողացա գտնել Լիտվացի համարտադրողի), այնպես էլ` հիմա, փորձում ենք գտնել համարտադրողներ: Փորձում ենք աշխարհագրությունն ընդլայնել, միջազգային ճանաչում ունենալ: Տասնյակ հանդիպումներ ենք ունեցել, անհատ առ անհատ, տաղավար առ տաղավար իրազեկել ենք ֆիլմի մասին: Դա ահռելի աշխատանք է: Պատմությունն այնքան ունիվերսալ ենք սարքել, որ ընկալելի է: Երեք պրոյեկտն էլ ընկալելի են»:

Ռեժիսորի որակմամբ` Կաննը բարդ շուկա է, և, ցավոք, հայաստանյան պատվիրակությունը, ֆինանսական սղության պատճառով, հնարավորություն չի ունեցել այնպիսի PR կազմակեպել, որ բոլորը խոսեն ֆիլմի մասին:

«Իրականում Թևանիկը լավ ֆիլմ է: Դա ոչ միայն իմ կարծիքն է, այլ նաև հանդիսատեսի, մասնագետների:

Կարևոր է նաև անունը: Կներեք իսկապես, բայց իմ անունը դեր չի խաղում Կաննում: Ոչ մեկը չի ասում. «Օհ, Ջիվանը ֆիլմ է բերել, գնանք տեսնենք` ինչ ֆիլմ է»: Այս ֆիլմը ո′ր երկրում ուզում ես, ցուցադրիր, կընկալվի: Տարբեր ժամանակաշրջաններում այս պատմությունն արդիական է: Ֆիլմին առաձգականություն է տրված»:

Ն.Ա.