Ստվերային տնտեսությունները կբերվեն հարկման դաշտ. խոսքը միլիարդների մասին է

Տնտեսական ակտիվության ֆոնի վրա հարկային եկամուտների աճի ապահովումը պարտադրում է, որ հիմնահարույց ոլորտային ուղղություններով աշխատանք տարվի: Եթե մենք ուզում ենք առաջիկա տարիներին որակական աճ ունենանք, ապահով, կայուն եկամուտներ ու հավասար պայմաններ, ինչի բացակայությունը խանգարում է մյուս բիզնեսների գործունեությանը, անհրաժեշտ են որոշակի միջոցառումներ: Այս մասին լրագրողների հետ զրույցում հայտնեց ՀՀ ֆինանսների նախարարի տեղակալ Արմեն Ալավերդյանը: «Առանձնացրել ենք 16 խոշոր ոլորտ, որոնցից յուրաքանչյուրի ներկայացուցիչներին հրավիրում ենք խորհրդակցության, մեզ մոտ առկա տեղեկատվության շտեմարանում վերլուծություններն ենք ներկայացնում ու աշխատանքային մթնոլորտում առաջարկում ինքնագնահատման միջոցով իրենց շրջանառությունները վերահայտարարագրեն, հարկերն էլ ավելի շատացնեն: Եթե իրենք գնան այդ քայլին, մենք հայտնել ենք, որ նրանց նկատմամբ մեղմ վարչարարություն կցուցաբերենք. ստուգումներ, չափագրում և այլ գործիքակազմ չենք կիրառի»,- ասաց փոխնախարարը' նշելով, որ պատրաստ են մինչև քննչական գործերի հարուցման գնալ, եթե ունենան փաստարկներ, որ առկա են տնտեսություններ, որոնք խուսափում են հարկերից:

Հարցին ի պատասխան, թե ինչ է արել պետությունը մինչ այժմ, ունենալով նշյալ տեղեկատվությունը, Արմեն Ալավերդյանը նշեց. «Ստվերը եղել է անկախության առաջին տարվանից, շարունակվում է առկա լինել մինչև այսօր ու դեռ կշարունակվի: Մեր աշխատանքի որակից է կախված, որ կարողանանք ստվերն աստիճանաբար բերել հարկային դաշտ: Եթե այս տարիների ընթացքում մենք կարողացել ենք հարկեր-ՀՆԱ ցուցանիշը 6-7 տոկոսից հասցնել 23-24 տոկոսի, էլ ինչի՞ մասին է խոսքը»:

Արմեն Ալավերդյանի հավաստմամբ' նույն չափորոշիչները կիրառելով, իրենք գործողություններ են իրականացնում տնտեսություններին ոչ միայն հարկման դաշտ բերելու, այլև հարկման ցուցանիշները բարձրացնելու ուղղությամբ: «Հարկման դաշտում են շատերը, բայց այդ չափը մեզ չի բավականացնում: Մենք պետք է գնանք նրան, որ ավելի շատ հարկ բերենք, ու խոսքը չի վերաբերում 10, 20 միլիոնին: Դրա հաշվին բյուջե չի կատարվի, խոսքը գնում է հարյուրավոր միլիոնների ու միլիարդների մասին, որը հետևողականորեն պետք է իրականցնենք: 2014-ն ունի 1 տրիլիոն 100 միլիարդ եկամուտ, մենք պետք է պետական բյուջեով նախատեսված այդ եկամուտները ապահովենք, մինչև այդ ստվերը չկրճատվի, մենք չենք կարող կատարել նշված 1 տրիլիոն 100 միլիարդը»,-հայտնեց ֆինանսների փոխնախարարը:

Ֆիննախարարի տեղակալի խոսքով' ստվերային տնտեսություններով կամ ցածր շահութաբերություն ներկայացնող կազմակերպություններով հարուստ ու իրենց ուշադրության կենտրոնում գտնվող ոլորտներն են' շինարարություն, կաթ-կաթնամթերք, միս-մսամթերք, հացամթերք, վառելիքի ոլորտ' ներմուծման ու իրացման դաշտերով, գազի կայանների ոլորտ, առողջապահության ոլորտ, ներմուծումների ոլորտ, մանրածախ առևտրի կետեր' տոնավաճառների ոլորտ:

2013 թվականի արդյունքներով' պետական բյուջեի ընդհանուր եկամուտները կազմել են ՀՆԱ-ի 25.1%-ը՝ նախորդ տարվա 23.7%-ի դիմաց, իսկ հարկային եկամուտները՝ ՀՆԱ-ի 23.5%-ը նախորդ տարվա 22%-ի դիմաց: Նախորդ տարվա նկատմամբ պետական բյուջեի եկամուտների անվանական աճը կազմել է 13.2%, իսկ հարկային եկամուտներինը' 14%:

ՀՆԱ-ի նկատմամբ պետական բյուջեի ծախսերի ցուցանիշը 2013 թ. արդյունքներով նախորդ տարվա նույն ժամանակահատվածի նկատմամբ աճել է 1.6%-ային կետով՝ կազմելով 26.8%: Ընթացիկ ծախսերը կազմել են ՀՆԱ-ի 23.8%-ը նախորդ տարվա 21.9%-ի դիմաց, իսկ ոչ ֆինանսական ակտիվների գծով ծախսերը կազմել են ՀՆԱ-ի 3%-ը' նախորդ տարվա 3.3%-ի դիմաց: Ընդ որում, նախորդ տարվա նկատմամբ ընթացիկ ծախսերն աճել են 16%-ով՝ պայմանավորված հիմնականում այլ ծախսերի, աշխատավարձի և ապրանքների ու ծառայությունների գծով ծախսերի աճով: