Իրաքում պայթյունների զոհ է դարձել մոտ 40 մարդ

Իրաքի տարբեր շրջաններում սեպտեմբերի 5-ին ականապատ մեքենաների պայթյուններից մոտ 40 մարդ զոհվել է, ավելի քան 70-ը՝ վիրավորվել:

Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, զոհերի թվում կան անվտանգության աշխատակիցներ: Մայրաքաղաք Բաղդադի հյուսիսում գտնվող Կազամիա շրջանում ականապատ մեքենայի պայթյունից 25 մարդ զոհվել է, ևս 45-ը՝ վիրավորվել: Պայթյունը որոտացել է շիաներով բանկեցված թաղամասում: Մեկ այլ ականապատ մեքենա պայթել է Ռամադի քաղաքում, որի հետևանքով 3 զինծառայող են զոհվել, ևս մեկ պայթյուն որոտացել է Թիրքիթ քաղաքում, որի զոհ են դարձել 5 մարդ:

Բացի այդ, իրաքյան ուժերի ևս 5 զինվոր զոհվել են Տուզխամատոյի շրջանում ԻԼԻՊ-ի հետ բախումների ժամանակ:

Անվտանգության տեսանկյունից Իրաքում վերջին շրջանում խորը ճգնաժամ է, որի հիմնական պատճառը ԻԼԻՊ խմբավորման գործունեության ակտիվացումն է: