Մոսկվան սպառնացել է ասիմետրիկ պատասխան տալ Արևմուտքի պատժամիջոցներին

Ռուսաստանը հարկադրված կլինի ասիմետրիկ պատասխան տալ Արևմուտքի երկրների կողմից հերթական պատժամիջոցներին, մասնավորապես, սահմանափակիչ միջոցառումները կարող են վերաբերել երկրի տարածքով օտարերկրյա ավիաընկերությունների թռիչքներին: Այդ մասին, ինչպես տեղեկացնում է «Արմենպրես»-ը, ՌԴ-ի վարչապետ Դմիտրի Մեդվեդևը հայտարարել է «Վեդոմոստի» թերթին տված հարցազրույցում: Ընդսմին նա նշել է, որ պատժամիջոցները «չեն օգնում խաղաղություն հաստատելու Ուկրաինայում»:

«Եթե լինեն էներգետիկայի հետ կապված պատժամիջոցներ, մեր ֆինանսական հատվածի հետագա սահմանափակումներ, մեզ հարկ կլինի ասիմետրիկ պատասխան տալ»,- նշել է Մեդվեդևը:

Նա հավելել է, որ տնտեսական պատժամիջոցների սահմանումը քաղաքական հետևանքներ կունենա: «Իսկ դրանք արդեն ավելի ահավոր են մատակարարումների սահմանափակումներից. հնարավոր է աշխարհում անվտանգության համակարգի փլուզում»,- հայտարարել է Ռուսաստանի կառավարության ղեկավարը:

Մինչդեռ, ինչպես տեղեկացնում է ԻՏԱՌ-ՏԱՍՍ-ը, Եվրախորհրդի նախագահ Հերման Վան Ռոմպեյը ֆլամանդական VRT հեռուստաալիքին տված հարցազրույցում հայտարարել է, որ Եվրամիությունը կարող է վերանայել ՌԴ-ի դեմ նոր պատժամիջոցներ սահմանելու հարցը, եթե Ուկրաինայում հրադադարը պահպանվի և հանգեցնի խաղաղության շուրջ բանակցությունների սկսվելուն:

The Wall Street Journal ամերիկյան թերթը հայտնել է, որ Ռուսաստանի նկատմամբ Եվրամիության նոր պատժամիջոցները նախատեսում է ռուսական այն ընկերությունների թվաքանակի ավելացում, որոնք չեն կարողանա միջոցներ փոխառնել կապիտալի շուկաներում:

Հրատարակության տեղեկությունների համաձայն՝ պատժիչ ցուցակում կներառվեն ՌԴ երեք հիմնական պետական նավթընկերությունները՝ «Գազպրոմ նեֆտը», «Տրանսնեֆտը» և Ռոսնեֆտը: Բացի այդ, պետության կողմից վերահսկվող հինգ բանկերի համար, որոնց ներկայումս արգելված է աշխատել մարման ավելի քան 90 օր ժամկետով եվրոպական փոխառու գործիքներով, այդ ժամկետը կկրճատվի մինչև 30 օր: Խոսքը վարկային հիմնարկությունների մասին է, որոնց նկատմամբ ԵՄ-ն պատժամիջոցներ է սահմանել հուլիսի վերջին, դրանք են՝ Սբերբանկը, Ռոսսելխոզբանկը, Գազպրոմբանկը, Վնեշէկոնոմբանկը և ՎՏԲ-ն: Նախատեսված են սահմանափակիչ այլ միջոցառումներ, մասնավորապես, պաշտպանության բնագավառում: