Սիրիայի հարցերով ՄԱԿ-ի նոր բանագնացը կմեկնի Դամասկոս

Սիրիայի հարցերով ՄԱԿ-ի նորանշանակ բանագնաց իտալացի Ստեֆան դե Միստուրան սեպտեմբերի 9-ին կմեկնի Դամասկոս: Ինչպես հաղորդում է «Արմենպրես»-ը՝ վկայակոչելով սիրիական «Ալ Ուատան» թերթը, իտալացի դիվանագետը Սիրիայում կմնա 3 օր և կառավարության հետ կքննարկի միջսիրիական բանակցությունները վերսկսելու վերաբերյալ հարցեր:

Միստուրան Սիրիայի հարցով ՄԱԿ-ի բանագնաց էր նշանակվել հուլիսի 23-ին: ՄԱԿ-ի այս որոշումը ողջունել էր Սիրիայի ԱԳՆ-ն՝ հայտարարելով, որ Միստուրայի օբյեկտիվ և արդար մոտեցումն իր հաջողությունը կունենա սիրիական ճգնաժամի լուծման հարցում: Սիրիայի ԱԳՆ-ն հույս էր հայտնել, որ նոր բանագնացը կհարգի Սիրիայի ինքնիշխանությունը, սիրիացի ժողովրդի կամքը և ընտրությունը:

Ավելի վաղ Սիրիայի հարցով ՄԱԿ-ի բանագնաց էր նշանակվել ալժիրցի դիվանագետ Ախդար Իբրահիմին, ով իր պաշտոնից հեռացել էր մայիսին՝ այդպես էլ հաջողության չհասնելով միջսիրիական բանակցություններում:

Միջսիրիական բանակցությունները ընդհատվել էին 2014թ. փետրվարին: