ՌԴ-ի դեմ պատժամիջոցները կհանվեն, եթե Ուկրաինայում խաղաղություն լինի. Մերկել

Գերմանիայի կանցլեր Անգելա Մերկելը inforadio-ի եթերում հայտարարել է, որ եթե Ուկրաինայում խաղաղ կարգավորման պլանն իրագործվի, ապա կարելի է խոսել ՌԴ-ի նկատմամբ պատժամիջոցները հանելու մասին, տեղեկացնում է «Արմենպրես»-ը:

«Մենք ցանկանում ենք տեսնել իրական գործողություններ: Դա նշանակում է, որ միայն խաղաղ պլանը բավարար չէ: Եթե այն իրագործվի, ապա հնարավոր կլինի խոսել պատժամիջոցները հանելու մասին: Բայց սկզբում մենք կցանկանայինք պարզորոշ հասկանալ տալ, որ այն, ինչ տեղի ունեցավ Ուկրաինայի արևելքում, և, հուսով եմ, շուտով կավարտվի՝ Ուկրաինայի տարածքային ամբողջականության խախտումը և այսպես կոչված անջատականների հետ Ռուսաստանի համագործակցությունը, մենք չենք ընդունում: Երկխոսության ճանապարհը բաց է մնում: Մենք այսուհետև էլ կվարենք այդ բանակցությունները, բայց նախ պետք է կատարվեն խաղաղ պլանի 12 կետերը»,- ասել է նա:

Կանցլերը նաև նշել է, որ Ռուսաստանի տնտեսության դեմ պատժամիջոցներն Ուկրաինայի նկատմամբ Ռուսաստանի գործողություններին արձագանքելու միակ հնարավորությունն են, քանի որ հենց սկզբից էլ հասկանալի էր, որ այդ հակամարտությունը ռազմական լուծում չունի: «Եթե մենք ամեն ինչ ինքնահոսի մատնեինք, ապա այն վնասը, որը կկրեինք մենք, այդ թվում՝ մեր տնտեսությունը, ավելի մեծ կլիներ, բայց հստակ հասկանալ ենք տալիս, որ եթե վերադառնանք նորմալ հարաբերությունների, ապա պատժամիջոցները, իհարկե, կհանվեն»,-հայտարարել է Մերկելը:

Կանցլերը նաև ընդգծել է, որ այսուհետև էլ ջանքեր է գործադրելու Ռուսաստանի և Ուկրաինայի ղեկավարության միջև շփումները կարգավորելու համար: Բացի այդ, նա ասել է, որ Ռուսաստան-ՆԱՏՕ Հիմնարար ակտն ուժի մեջ է մնում. «Մենք չենք ցանկանում այն չեղարկել, մենք ցանկանում ենք ասել, որ այն մեզ համար մնում է հիմք և Ռուսաստանի հետ համագործակցելու առաջարկություն», հաղորդել է ՌԻԱ Նովոստին: