Քեմերոնը կայցելի Շոտլանդիա՝ բնակչությանը համոզելու դեմ քվեարկել անկախությանը

Մեծ Բրիտանիայի վարչապետ Դևիդ Քեմերոնը, փոխվարչապետ Նիկ Կլեգը և Լեյբորիստական կուսակցության առաջնորդ Էդ Միլիբենդը ուղևորվում են Շոտլանդիա՝ համոզելու տեղի ընտրողներին՝ քվեարկել տարածաշրջանի անկախության դեմ: Այդ մասին, ինչպես տեղեկացնում է «Արմենպրես»-ը, Ֆեյսբուքի իր էջում գրել է Միլիբենդը:

«Շոտլանդացիներին մեր ուղերձը պարզ է լինելու՝ «մենք ցանկանում եք, որ դուք մնաք»,-նշել է խորհրդարանականը:

«Մեզ շատ բան է բաժանում, բայց կա մի կետ, որում մենք սրտանց համաձայնում ենք. Միացյալ Թագավորությունն ավելի լավն է միասնության մեջ»,-հավելել է նա:

Ավելի վաղ Մեծ Բրիտանիայի ֆինանսների նախարարը հայտարարել է, որ պետությունը պատրաստ է ավելի լայն ինքնավարություն տրամադրել Շոտլանդիային, եթե Էդինբուրգը հրաժարվի անկախության հարցի շուրջ հանրաքվեի անցկացումից: Նրա խոսքով՝ ավելի լայն իրավունքներ կարող են տրամադրվել հարկման և սոցիալական ոլորտներում, հաղորդել է ԻՏԱՌ-ՏԱՍՍ-ը:

TNS ընկերության կողմից անկացված նոր հարցումը ցույց է տվել, որ Մեծ Բրիտանիայից տարածաշրջանի անջատման կողմնակիցների և անկախության հակառակորդների թվաքանակը գրեթե հավասար է:

Այն դեպքում, եթե Շոտլանդիայի բնակիչների մեծամասնությունը սեպտեմբերի 18-ին «այո» պատասխանի «Շոտլանդիան պետք է արդյոք անկախ պետություն լինի» հարցին, ապա 2016 թվականի մարտի 24-ին Շոտլանդիան դուս կգա Միացյալ Թագավորության կազմից:

TNS ընկերության տվյալների համաձայն՝ հանրաքվեի անցկացումից ինն օր առաջ Շոտլանդիայի անկախության օգտին կքվեարկեր շոտլանդացիների 38 տոկոսը, դեմ՝ տարածաշրջանի բնակիչների 39 տոկոսը: Մեկ ամիս առաջ, ինչպես նշում է TNS-ը, Շոտլանդիայի անջատման կողմնակիցների թիվն ավելի պակաս էր և կազմում էր 32 տոկոս, դեմ էր հանդես գալիս շոտլանդացիների 45 տոկոսը:

Ավելի վաղ YouGov ծառայության և Sunday Times թերթի անցկացրած հարցման արդյունքները ցույց են տվել, որ տարածաշրջանի անկախության օգտին պատրաստ է քվեարկել Շոտլանդիայի բնակիչների 51 տոկոսը, դեմ՝ 49 տոկոսը: