Մենք չենք ցանկանում, որ ժողովուրդների այս ընտանիքը մասերի բաժանեն. Քեմերոնը խնդրել է շոտլանդացիներին՝ չմասնատել Մեծ Բրիտանիան

Մեծ Բրիտանիայի վարչապետ Դևիդ Քեմերոնը խնդրել է շոտլանդացիներին՝ չմասնատել Միացյալ Թագավորությունը և դեմ քվեարկել անկախությանը սեպտեմբերի 18-ի հանրաքվեում: Այդ մասին, ինչպես տեղեկացնում է «Արմենպրես»-ը, նա հայտարարել է սեպտեմբերի 10-ին Daily Mail թերթում հրապարակված հոդվածում:

Քեմերոնը Մեծ Բրիտանիան անվանել է «առանձնահատուկ երկիր» և նախազգուշացրել, որ նրա ապագան հայտնվել է հարցականի տակ: «Մեր միությունը թանկ արժե: Մի պառակտեք այն»,- գրում է կառավարության ղեկավարը:

Նա հիշեցնում է Շոտլանդիայի և Միացյալ Թագավորության մյուս մասերի համատեղ անցյալի մասին, նաև նշում է երկրի ժամանակակից սոցիալական նվաճումները, նախ և առաջ առողջապահության ազգային համակարգը, որը երաշխավորում է բոլոր քաղաքացիների անվճար բուժումը, ինչպես նաև կենսաթոշակային համակարգը:

«Թող Շոտլանդիայում ոչ ոք չկասկածի՝ մենք ամբողջ հոգով ցանկանում ենք, որ դուք մնաք,- ասված է հոդվածում:- Մենք չենք ցանկանում, որ ժողովուրդների այս ընտանիքը մասերի բաժանեն»:

«Եթե մենք միասին մնանք, կկարողանանք ավելի լավ ապագա կառուցել մեր երեխաների համար:- Մենք կարող ենք այնպես անել, որ մեր ապագան արժանի կլինի մեր պատմությանը, որովհետև երկրորդ հնարավորությունը մենք չենք ունենա: Եթե Միացյալ Թագավորությունը տրոհվի, դա կլինի ընդմիշտ»,- ընդգծել է Քեմերոնը, հաղորդել է ԻՏԱՌ-ՏԱՍՍ-ը: