Մալայզիական Boeing-ի օդաչուների մարմիններում օտար բեկորներ են հայտնաբերվել

Աշխարհ 11 Սեպտեմբեր, 2014 0:08

Ուկրաինայի արևելքում մալայզիական Roeing-ի կործանման պատճառները պարզելուն կարող է օգնել այն օտար բեկորների փորձաքննությունը, որոնք հայտնաբերվել են օդաչուների մարմիններում: Այդ մասին, ինչպես տեղեկացնում է «Արմենպրես»-ը, սեպտեմբերի 10-ին հեռախոսով ՌԻԱ Նովոստիին հայտարարել է Հոլանդիայի Անվտանգության խորհրդի ներկայացուցիչ Սառա Ֆեռնոյը:

«Մի քանի բեկորներ են հայտնաբերվել անձնակազմի անդամների, օդաչուների մարմիններում: Մենք պետք է հետաքննություն անցկացնենք, որպեսզի հասկանանք՝ դրանք ինքնաթիռի դետալներ են արդյոք: Եթե ոչ՝ դրանք կարող են լինել արտաքին օբյեկտների բեկորներ: Ներկա պահին մենք չգիտենք, թե ինչ բեկորներ են դրանք: Փորձագետները հետազոտում են զոհվածների մարմինները»,- ասել է Ֆեռնոյը:

Նախօրյակին Նիդեռլանդների նախնական զեկույց է հրապարակվել է Ուկրաինայի արևելքում կործանված մալայզիական Boeing-ի վերաբերյալ: «Օդաչուների խցում ոչ մի նախազգուշական ազդանշան չի լսվել, որը կմատնանշեր տեխնիկական խնդիրների առկայությունը,-ասված է փաստաթղթում:-Չկան այն բանի վկայություններ, որ ինքնաթիռի աղետը պայմանավորված է տեխնիկական անսարքություններով կամ անձնակազմի սխալներով»:

Հետաքննության տվյալների համաձայն՝ ինքնաթիռի բեկորների ցրվածության բնույթը վկայում է այն մասին, որ ինքնաթիռը ջախջախվել է օդում: «Մալայզիական ավիաուղիների» Boeing-777-200-ը, որը կատարում էր NH-17 չվերթը, ջախջախվել է օդում, հավանաբար ինքնաթիռին մեծ էներգիայով օժտված բազմաթիվ առարկաների բախվելու հետևանքով»,-նշվում է զեկույցում:

Դրանում ճշգրիտ տվյալներ չկան արտաքին ներգործության բնույթի վերաբերյալ:

Ինքնաթիռի անկման պատճառները վերջնականապես պարզելու համար կպահանջվի լրացուցիչ հետաքննություն: Վերջնական զեկույցը պետք է հրապարակվի ավիաաղետի պահից մեկ տարվա ընթացքում:

«Մալայզիական ավիաուղիներ» ընկերության Boeing-777-ը, որը չվերթ էր իրականացնում Ամստերդամ-Քուալա Լումպուր երթուղով, հուլիսի 17-ին կործանվել է Ուկրաինայի Դոնեցկի մարզում: Օդանավում գտնվող բոլոր 298 մարդիկ զոհվել են: Նրանց մեծամասնությունը՝ թվով 196 մարդ, Նիդեռլանդների հպատակներ են: