Ալիևը սեփական դեմքը «փրկելու» ճիգեր է գործադրում

Ամերիկյան առաջատար The New Jork Times թերթն իր երեկվա համարում ծավալուն ինֆոգրաֆիկ հոդված էր հրապարակել Միացյալ Նահանգներում տեղակայված ուղեղային կենտրոններում նավթային փողերով ազդեցություն գնելու շուրջ Ադրբեջանի կառավարության ջանքերի մասին:

Ինչպես հաղորդում է «Արմենպրես»-ը, թերթն իր այսօրվա համարում զետեղել է Ադրբեջանի կառավարության հայտնի վարձու լոբբիստ, Իսրայելի Հայֆա համալսարանի պրոֆեսոր, ԱՄՆ Ջորջթաունի համալսարանի հետազոտող Բրենդա Շաֆերի հոդվածը, որում փորձ է արվում օգոստոսի սկզբին Ադրբեջանի բանակի կողմից ՀՀ և ԼՂՀ սահմաններում իրագործած դիվերսիոն գործողությունները վերագրել հայկական կողմին: Միանշանակ է, որ այդ գործողությունները հրահանգած Ադրբեջանի նախագահ Իլհամ Ալիևն ամերիկյան թերթում իր լոբբիստ Բրենդա Շաֆերի բերանով արտահայտած անհեթեթություններով հոդվածի տպագրությունը հովանավորել է սեփական բանակի կրած խայտառակ պարտությունից իր դեմքը «փրկելու» համար:

Հոդվածում Բ. Շաֆերն ուկրաինական իրադարձությունների և Ադրբեջանի հետ ՀՀ և ԼՂՀ սահմաններում վերջին լարվածության համար մեղադրում է Ռուսաստանին: Նա նշում է, որ Մոսկվան այդ քայլերն անում է հակամարտ կողմերին «մշտապես իր ազդեցության տակ պահելու» և տարածաշրջանում «ռուս խաղաղապահներ տեղակայելու» համար:

Հոդվածի «մեխն» այն է, որ Բ. Շաֆերը «հավաստում է», թե հայերն, իբր, «երեք կողմից Ադրբեջանի վրա հարձակվել են երկրից Իլհամ Ալիևի բացակայելու ժամանակ»: «Հուլիսի 31-ին հայերն անակնկալ և համակարգված կերպով երեք կողմից հարձակվեցին Ադրբեջանի վրա: Այդ հարձակման ժամանակ նախագահ Իլհամ Ալիևն ու պաշտպանության նախարար Զաքիր Հասանովը գտնվում էին երկրից դուրս»,- գրում է Բ. Շաֆերը' ակնհայտ կերպով կրկնելով օգոստոսի սկզբին կրած խայտառակ պարտությունից շոկի մեջ հայտնված ադրբեջանական կողմի զառանցանքները:

Ավելին' Բ. Շաֆերը «որոշում է», թե ինչ պետք է անի ԱՄՆ-ը Ռուսաստանի դեմ: «Ղարաբաղյան հակամարտությունը լուծված չլինելու համար Վաշինգտոնը պետք է մեղադրի Ռուսաստանին և հակազդի տարածաշրջանում լրացուցիչ ռազմական ուժեր տեղակայելու Մոսկվայի ծրագրերին»,- գրում է նա: Այնուհետև Ադրբեջանի լոբբիստն անդրադառնում է Սոչիում ՌԴ նախագահ Վլադիմիր Պուտինի միջնորդությամբ ՀՀ նախագահ Սերժ Սարգսյանի և Իլհամ Ալիևի հանդիպմանը և ափսոսանք հայտնում, որ այդ հանդիպման ժամանակ չհաջողվեց առաջընթաց գրանցել ԼՂ հակամարտության կարգավորման գործում:

Բաքվի հանձնարարությամբ խոսող Բ. Շաֆերը լավ գիտի, որ ԼՂՀ և ՀՀ սահմաններում օգոստոսյան լարվածության հեղինակն Իլհամ Ալիևն է: Այդ դիվերսիաներով փորձելով հասնել ինչ-որ հաջողությունների, Ալիևը մտածում էր Սոչի մեկնել «հաղթողի» կեցվածքով և հայկական կողմերին սեփական կամքը «պարտադրել»: Սակայն ՀՀ և ԼՂՀ զինված ուժերը, ինչպես միշտ, զգոն գտնվեցին և հակառակորդին հետ շպրտեցին իրենց նախկին դիրքերը' պատճառելով մարդկային և նյութական մեծ կորուստներ:

The New York Times թերթի երեկվա ինֆոգրաֆիկ հոդվածում ցուցադրվել է Ադրբեջանի կառավարության լոբբիստական գործունեությունն անդրադարձնող 13 փաստաթուղթ: Ստորագրված պայմանագրերում հաստատվում է, որ լոբբիստական ընկերությունը Ադրբեջանի կարևորությունը ԱՄՆ-ի համար բարձրացնելու նպատակով վճարովի ծառայություններ է մատուցում: Նշվում է, որ Վաշինգտոնում գտնվող «DCI Group» և «Podesta Group» լոբբիստական ընկերությունների հետ պայմանագրերը ստորագրել է ԱՄՆ-ում Ադրբեջանի դեսպան Էլին Սուլեյմանովը:

Ամերիկյան թերթն ուշադրություն է հրավիրում ազդեցություն գնելու շուրջ ուղեղային կենտրոնների հետ առևտրի մեջ մտած Atlantik Council վերլուծական կենտրոնի գործունեությանը, որի առաջատար դոնորների թվում է նաև Ադրբեջանի պետական նավթային ընկերությունը (SOCAR):

Թերթը նշում է, որ Վաշինգտոնում գործող մի շարք վերլուծական կենտրոններ վերջին տարիներին միջոցառումներ են կազմակերպել, որոնք կենտրոնացած են եղել ադրբեջանցի լոբբիստների կողմից որոշ թեմաներ առաջ տանելու վրա: Դրանց թվում է Atlantic Council-ի կազմակերպած միջոցառումը, որի ընթացքում կարևորվել են «Ադրբեջանի համաձայնեցված ջանքերը' որպես ՆԱՏՕ-ի գործընկեր իր նշանակությունը ցույց տալու նպատակով»: Միջոցառման մասնակիցներից Բրենդա Շեֆերը, նաև Պետքարտուղարի օգնական Էրիկ Ռուբինն ու Atlantic Council-ի նախագահ Ֆրեդերիկ Քեմփեյն ընդգծել են Կովկասում Եվրոատլանտյան ռազմական դաշինքի համար Ադրբեջանի կարևորությունը:

Ինֆոգրաֆիկ հոդվածում տեղ է գտել նաև դեսպան Էլին Սուլեյմանովի' «Podesta» խմբի ղեկավար Էնթոնի Պոդեստայի հետ ստորագրած համաձայնությունը, որն ուժի մեջ է մտել 2014 թվականի հունվարի 1-ից: Այդ համաձայնագրով վերջինս պետք է պրոպագանդի Ադրբեջանի դիրքորոշումը բազմաթիվ հարցերի շուրջ, որի համար Բաքուն պետք է ամսական 50 հազար դոլար փոխանցի նրա ընկերությանը և փակի մնացած բոլոր լրացուցիչ ծախսերը: