ՄԱԿ-ը համագործակցում է ԵԱՀԿ-ի հետ՝ Ուկրաինայում մոնիթորինգն ուժեղացնելու համար

ՄԱԿ-ի գլխավոր քարտուղար Պան Գի Մունը հայտարարել է Ուկրաինայի հարավ-արևելքում հրադադարի ռեժիմի «պատշաճ մոնիթորինգի և ստուգման կարևորության» մասին: Այդ մասին նա Ուկրաինայի նախագահ Պյոտր Պորոշենկոյին հայտնել է հեռախոսազրույցի ընթացքում, տեղեկացնում է «Արմենպրես»-ը՝ հղում անելով Ուկրաինայի ղեկավարի կայքին:

Պան Գի Մունը նաև նշել է, որ «ՄԱԿ-ն այդ մոնիթորինգն ուժեղացնելու նպատակով համագործակցում է ԵԱՀԿ-ի հետ»: ՄԱԿ-ի գլխավոր քարտուղարի խոսքով՝ «դիվանագիտական քայլերը չափազանց կարևոր են Ուկրաինայում խաղաղություն հաստատելու համար»: Պյոտր Պորոշենկոն, իր կողմից, նշել է ԵԱՀԿ-ի մոնիթորինգային առաքելության թվակազմն ավելացնելու անհրաժեշտությունը:

Բացի այդ, ուկրաինական պետության ղեկավարի կարծիքով, «վաղաժամկետ խորհրդարանական և տեղական ընտրությունների անցկացումը հիմք կապահովի քաղաքական գործընթացի համար, ինչը կկարողանա կայուն խաղաղ գործընթաց ապահովել Ուկրաինայի, Դոնեցկի և Լուգանսկի մարզերում»:

Զրուցակիցները նաև քննարկել են Դոնբասում մարդու իրավունքների հարգումը և հումանիտար խնդիրների լուծման ուղիները, մասնավորապես, Կարմիր խաչի հետ ջանքերի համակարգման ճանապարհով, հաղորդել է ԻՏԱՌ-ՏԱՍՍ-ը: