Կատալոնիան մեծ հույսեր է կապում շոտլանդական հանրաքվեի հետ

Կատալոնիայի կառավարության նախագահ Արթուր Մասը մեծ հույսեր է կապում սեպտեմբերի 18-ին նշանակված շոտլանդական հանրաքվեի հետ՝ ընդգծելով, որ դրա արդյունքից է կախված հանրաքվեի ճակատագիրը նաև Իսպանիայի ինքնավար մարզում, որը տեղի իշխանությունները մտադիր են անցկացնել այս տարվա նոյեմբերի 9-ին: Այդ մասին, ինչպես տեղեկացնում է «Արմենպրես»-ը, նա Agence France-Presse-ին տված հարցազրույցում հայտնել է Կատալոնիայի օրվա տոնակատարության նախօրյակին:

«Դա չափազանց կարևոր է, քանի որ, եթե Շոտլանդիայի պես երկիրն իրավունք ունի ինքնուրույն տնօրինել իր ապագան, ապա դա արդարացի կլինի նաև Կատալոնիայի համար»,- հավելել է նա:

«Ես բացարձակապես վստահ եմ, որ Եվրոպայի ղեկավարները կպաշտպանեն շոտլանդական հանրաքվեի ցանկացած արդյունք»,- հայտարարել է Մասը, հույս հայտնելով, որ Շոտլանդիայի անկախության կողմնակիցների հաղթանակի դեպքում ԵՄ-ն կնպաստի նրան Եվրամիության կազմում ընդունելու շուրջ բանակցությունների շուտափույթ անցկացմանը, հաղորդել է ԻՏԱՌ-ՏԱՍՍ-ը: