Վրաստանի նախագահի այցն ԱՄՆ ձախողվել է

Վրաստանի նախագահ Գեորգի Մարգվելաշվիլին սեպտեմբերի 11-ին հայտարարել է, որ իր ուղևորությունը ՄԱԿ-ի Գլխավոր ասամբլեայի 69-րդ նստաշրջան, որը սեպտեմբերի 21-ից մինչև 30-ը տեղի է ունենալու Նյու Յորքում, ձախողվել է, տեղեկացնում է «Արմենպրես»-ը՝ հղում անելով «Նովոստի Գրուզիա»-ին:

«ՄԱԿ-ի Գլխավոր ասամբլեայի նստաշրջան իմ այցը ձախողված է… Այսօր առավոտյան հայտնի դարձավ, որ լուրջ աշխատանք է կատարվել այդ այցին խանգարելու համար»,- ասել է Մարգվելաշվիլին:

Վրաստանի արտաքին գործերի նախարար Մայա Փանջիկիձեն ավելի վաղ հայտարարել է, որ իր գերատեսչությունը կոնսուլտացիաներ է վարում նախագահի վարչակազմի հետ, որպեսզի պետության ղեկավարը հրաժարվի ՄԱԿ-ի Գլխավոր ասամբլեայի նստաշրջան ուղևորությունից: Բացի այդ, սեպտեմբերի 10-ին Փանջիկիձեն անձնական հանդիպում է ունենել նախագահի հետ: Կողմերը գոհ էին մնացել կայացած բանակցություններից, բայց վերջնական որոշում չէր ընդունել:

Վրաստանի նախկին վարչապետ և իշխող «Վրացական երազանք» կոալիցիայի հիմնադիր Բիձինա Իվանիշվիլին, մեկնաբանելով ՄԱԿ-ի Գլխավոր ասամբլեայի 69-րդ նստաշրջան հանրապետությունից երկու պատվիրակությունների ուղևորման հետ կապված իրադրությունը, նշել է, թե շատ տգեղ կլինի, եթե «փոքրիկ, աղքատ երկրից Ամերիկա մեկնի երկու առանձին պատվիրակություն»: Իվանիշվիլին համակարծիք է նախարարների կաբինետի անդամների մեծամասնության հետ, որ ՄԱԿ-ի ԳԱ-ում վրացական պատվիրակությունը պետք է ներկայացնի վարչապետ Իրակլի Ղարիբաշվիլին: