Ֆրանսիայի նախագահն Իրաքի նախագահի հետ քննարկել է ԻԼԻՊ-ի դեմ պայքարելու ուղիները

Ֆրանսիայի նախագահ Ֆրանսուա Օլանդը սեպտեմբերի 12-ին աշխատանքային այցով ժամանել է Իրաքի մայրաքաղաք Բաղդադ: Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, Օլանդը նախագահական նստավայրում հանդիպում է ունեցել իր գործընկեր Ֆուադ Մաասումի և վարչապետ Հեյդար ալ Աբադիի հետ: Նա նշել է, որ Ֆրանսիան կշարունակի օ գնել Իրաքին:

Օլանդի խոսքով՝ Ֆրանսիան ներկայումս ռազմական և մարդասիրական օգնություն է ցուցաբերում Իրաքին, որը շարունակական կլինի: Օլանդը նաև ավելացրել է, որ Ֆրանսիայի և Իրաքի համերաշխությունն առաջին հերթին քաղաքական դրսևորում ունի: Նա ողջունել է ընտրությունների անկացումը և նոր կառավարության կազմավորումը:

«Իրաքին աջակցելով' Ֆրանսիան հնարավորություն է տալիս միջազգային հանրությանը պահպանել սեփական անվտանգությունը և ճակատագիրը, այդ պատճառով որոշում է կայացվել Ֆրանսիայում Իրաքի հարցով միջազգային համաժողով անցկացնել, որը տեղի կունենա սեպտեմբերի 15-ին Փարիզում»,- նշել է նախագահը՝ պարզաբանելով, որ միջազգային համաժողովի նպատակն է համախմբել օգնությունն ու օժանդակությունը Իրաքի հանդեպ ԻԼԻՊ դեմ պայքարում:

Իրաք կատարած այցելության ժամանակ Օլանդին ուղեկցել են Ֆրանսիայի Արտաքին գործերի նախարար Լորան Ֆաբիուսը և Պաշտպանության նախարար Ժան Իվ Լե Դրիան:

Օլանդը նաև կմեկնի Իրաքյան Քրդստան: Նախագահական ինքնաթիռը 15 տոննա մարդասիրական օգնություն կտրամադրի այդ շրջանում բազմաթիվ փախստականներին: