Կուրցը Մամեդյարովին է հանձնել Ադրբեջանում քաղբանտարկյալների ցուցակը

«Ադրբեջանի արտգործնախարար Էլմար Մամեդյարովի հետ մենք հանգամանալից զրույց ենք ունեցել Ադրբեջանում մարդու իրավունքների մասին: Ես նրան հանձնել եմ ադրբեջանցի քաղաքական բանտարկյալների ցուցակը: Մարդու իրավունքների քննարկումը մեզ մոտ անցել է խիստ լարված»,- ինչպես հաղորդում է «Արմենպրես»-ը, Բաքվում լրագրողներին հայտարարել է Ավստրիայի արտաքին գործերի նախարար Սեբաստիան Կուրցը:

Նա ասել է, որ Ադրբեջանի նախագահ Իլհամ Ալիևի և իր գործընկեր Մամեդյարովի հետ հանդիպումներում ընդգծել է Ադրբեջանում մարդու իրավունքների հետ կապված իրավիճակի բարելավման անհրաժեշտությունը:

Սակայն Ադրբեջանի արտաքին գերատեսչության ղեկավար Մամեդյարովի կարծիքով, «Ադրբեջանում մարդու իրավունքների հետ կապված իրավիճակն ավելի լավ է, քան տարածաշրջանի երկրներում և անգամ Եվրոպայում»: Այս մասին Մամեդյարովը երեկ հայտարարել է Բաքվում ընթացող միջազգային համաժողովի ժամանակ: