Ադրբեջանում շարունակում են ծաղրել Եվրոպական խաղերի խորհրդանիշը

Ադրբեջանի երիտասարդության և սպորտի նախարարության կողմից 2015 թվականին Բաքվում անցկացվելիք Եվրոպական խաղերի համար ընտրված խորհրդանիշները շարունակում են ծաղրի առարկա մնալ սոցցանցերում:

Ինչպես հաղորդում է «Արմենպրես»-ը, այս մասին տեղեկացնում է ադրբեջանական minval.az կայքը:

Խաղերի խորհրդանիշը գունավոր գրաֆիկական նկար է լայն տաբատով և արևելյան մշակույթին բնորոշ շարժուձևով նկարված վիթի (ջեյրան) ու նռան պատկերներով:Արդեն մի քանի օր սոցցանցերում օգտատերերն իսկական զավեշտի են վերածել Եվրոպական խաղերի խորհրդանիշը' այն ներկայացնելով զանազան ծիծաղաշարժ կերպարներով: Օրինակ, նկարներից մեկում երևում է ինքնասպանության եզրին գտնվող, կամուրջի վրա հայտնված նուռը, իսկ մյուսում նռան գլխի փոխարեն նռնակ է: Նկարներից մեկում խորհրդանիշն ինքնասպան է լինում' հրացանքով գլխին կրակելով, որոշներում էլ խորհրդանիշը տիպիկ ադրբեջանցու տեսքով է ներկայացված: