«Կոֆեինն օգնում է պաշտպանվել Ալցհայմերի հիվանդությունից». գիտնականներ

Սուրճի չափավոր գործածումը կարող է 20 տոկոսով նվազեցնել Ալցհայմերի հիվանդության զարգացման վտանգը: Այս մասին, ինչպես տեղեկացնում է «Արմենպրես»-ը, Եվրոպայի «Alzhemier-2014» գիտաժողովում հայտնել են Սուրճի մասին գիտական տեղեկատվության ինստիտուտի (Institute for Scientific Information on Coffee (ISIC) ներկայացուցիչները:

ISIC-ի ներկայացուցիչների զեկույցի համաձայն՝ չորս տարի անցկացվել են հետազոտություններ, որոնց ընթացքում պարզվել է, որ օրական 3 – 5 գավաթ սուրճի գործածումը կարող է օրգանիզմին օգնել պաշտպանվելու Ալցհայմերի հիվանդությունից: Այս ծանր հիվանդությունը միջին հաշվով ախտահարում է 65-ից բարձր տարիքի քսան մարդուց մեկին: Եվրոպայում 65 տարեկանից բարձր մարդկանց թիվն առաջիկա տարիներին 15,4 տոկոսից կաճի մինչև 22,4 տոկոս, և եվրոպացիների համար Ալցհայմերի հիվանդությունը կդառնա լրջագույն հիմնախնդիր:

Ըմպելիքի պարունակած կոֆեինն օգնում է կանխելու ուղեղում ամիլոիդային թիթեղիկների և նեյրոֆիբրիլյար թնջուկների՝ Ալցհայմերի հիվանդության երկու նշանների առաջացումը: Ի լրումն դրա, ինչպես կոֆեինն, այնպես էլ պոլիֆենոլները նվազեցնում են գլխուղեղի բջիջների բորբոքումն ու մաշումը, առանձնապես հիպոկամպում և կեղևում, հաղորդել է ՌԻԱ Նովոստին: