Արսեն Ջուլֆալակյանն՝ ընդդեմ ԱՄՆ-ի եռակի չեմպիոն Կայլ Դեյկի

Հունահռոմեկան ոճի Հայաստանի լավագույն ըմբիշներից մեկը՝ 2014 թ աշխարհի առաջնության 75 կգ քաշային կարգի աշխարհի չեմպիոն, 2012 թ օլիմպիական խաղերի փոխչեմպիոն, 2009-2010 թթ Եվրոպայի չեմպիոն, 27-ամյա անվանի ըմբիշ Արսեն Ջուլֆալակյանը պատվաբեր ու պատմական առաջարկ է ստացել իր երազած Նյու-Յորքի նշանավոր «Մեդիսոն Սքվեր Գարդեն» (Madison Square Garden՝ MSG ) մարզապալատում այս տարվա դեկտեմբերի 21-ին մրցամարտ անցկացնելու ԱՄՆ-ի լավագույն ըմբիշներից մեկի՝ ԱՄՆ-ի օլիմպիական հույս հանդիսացող, երկրի եռակի չեմպիոն, NCAA՝ քոլեջների ազգային ատլետիկ ընկերակցության քառակի չեմպիոն, 23-ամյա Կայլ Դեյկի հետ: Վերջինս միակն է, ում 4 անգամ հաջողվել է դառնալ NCAA-ի չեմպիոն ՝4 տարբեր քաշային կարգերում: Նա 2012 թ Լոնդոնի օլիմպիադա մեկնող թեկնածուների թվում է եղել, սակայն ԱՄՆ-ի առաջնությունում ի վերջո 3-րդ տեղն է գրավել, որի պատճառով էլ չի մեկնել Լոնդոն: Դեյկին այս տարի էլ վնասվածքի պատճառով չմասնակցեց սեպտեմբերին Տաշքենդում անցկացված ըմբշամարտի աշխարհի առաջնությունում:

Դեկտեմբերի 21-ին MSG- մարզապալատում տեղի են ունենալու քոլեջների ըմբշամարտի առաջնության հանդիպումներ, իսկ երեկոյի գլխավոր իրադարձությունն ու զարդն էլ լինելու հենց Ջուլֆալակյան-Դեյկ հանդիպումը: Բացառիկ այս մենամարտը կազմակերպվել է մարզական սննդի հայտնի Grapple ընկերության հովանավորությամբ: Մարզապալատ մուտք գործելու տոմսերն այդ երեկո արժենալու են 20-55 դոլար:

Այս ամենի մասին տեղեկանում են ըմբշամարտի ԱՄՆ-ի պաշտոնական կայքում՝ hwww.teamusa.org-ում ՝ զետեղված ընդարձակ հոդվածից: Այս պատմական մենամարտի մարտահրավերն ընդունելու առիթով Արսենը նշել է հետևյալը.

«Իմ հետաքրքրությունը մեծապես շարժեց այս եզակի հնարավորությունը՝ հանդիպելու ԱՄՆ-ի լավագույն ըմբիշ Կայլ Դեյկի հետ: Միշտ էլ իմ երազանք է եղել մրցակցել «Մեդիսոն Սկվեր Գարդենում», և ես իհարկե անհամբերությամբ սպասում եմ Նյու–Յորքի հայ համայքի աջակցությանը»,- գրում է wrestling.am-ը: