«Չենք տարվելու աջից ու ձախից փչող հովերով». Հովիկ Աբրահամյանը` 2015 թվականի պետական բյուջեի նախագծի մասին

Պատշաճ մակարդակի ծախսեր են նախատեսված պաշտպանության, հասարակական կարգի պահպանության և ազգային անվտանգության ապահովման համար: 2015 թվականին ևս շարունակելու ենք ցուցաբերել ֆինանսական աջակցություն Լեռնային Ղարաբաղի Հանրապետությանը: Այս մասին Ազգային ժողովում ՀՀ 2015թ. պետակակն բյուջեի քննարկման ժամանակ եզրափակիչ ելույթում հայտարարեց ՀՀ վարչապետ Հովիկ Աբրահամյանը:

«Ես հստակ գիտեմ իմ անելիքները և անշեղորեն դրանք իրագործելու եմ: Մենք գիտենք՝ ինչ ենք անելու և ինչու, և մանր ինտրիգներն ու օդացունց քննադատությունները մեզ չեն շեղելու: Չենք տարվելու աջից ու ձախից փչող հովերով, կամա թե ակամա օտարի ջրաղացին ջուր լցնող մտայնություններով:
Միևնույն ժամանակ մենք քարացած չենք և ունակ ենք լսելու: Գիտենք, որ կան երկրի համար անհրաժեշտ խնդիրներ, որոնք լուծման կարիք ունեն և չունեն պարզ պատասխաններ: Մենք դա իրականացնելու համար համագործակցելու կամք ունենք: Խնդիրների լուծման հրամայականը մեզ համար կարևոր է քաղաքական կոնյուկտուրայից: Մենք պատրաստակամ ենք երկխոսելու»,- ասաց Հովիկ Աբրահամյանը:

Ըստ վարչապետի` երկխոսության պատրաստակամությունը, միևնույն ժամանակ, չի նշանակում երկխոսություն հանուն երկխոսության, չի նշանակում հանդուրժողականության իմիտացիա, չի նշանակում կապիտուլյացիա:
Երկխոսությունը նշանակում է երկխոսություն: Ազնիվ և անկեղծ: Երբ բերվում են փոխադարձ փաստարկներ, անկեղծորեն քննարկվում են դրանց հնարավոր հետևանքները և ազնվորեն ընդունվում առավել ծանրակշիռները: Չի կարող, օրինակ, միջազգային պրակտիկայում մերժված գաղափարն ընդդիմության պահանջով դառնալ իրականություն: Սակայն այն երևույթը, որն ուղղելու համար ընդդիմությունը առաջարկել է այդ գաղափարը, կարող է և պետք է քննարկվի և շտկվի: Կարևորն ազնիվ ու անկեղծ քննարկումն է: