Եռյակում խնդիրներ կան

Ազգային ժողովի «Ժառանգություն» խմբակցության ղեկավար Ռուբեն Հակոբյանը խոստովանում է, որ Եռյակում խնդիրներ կան, որոնք լուծման կարիք ունեն: Խորհրդարանական ճեպազրույցների ընթացքում Ռուբեն Հակոբյանը նկատեց, որ դեռևս այն ժամանակ, երբ ոչ իշխանական ուժերի համագործակցությունը խորհրդարանական ձևաչափից դուրս չէր եկել, օրակարգը միասնական էր:

«Երբ համագործակցությունն ընդլայնվեց և ստացավ միջկուսակցական մակարդակ, արդեն սկսվեցին խնդիրները: Եղան հակասական հայտարարություններ, որոնք արդեն խոսում էին միասնական օրակարգի բացակայության մասին: Միայն այն, որ Եռյակի անդամ քաղաքական ուժերի առաջնորդների ընդամենը մեկ եռակողմ հանդիպում է եղել, բավական է, որպեսզի այդ խնդիրները լինեն: Եթե Եռյակի լիդերներն ավելի լուրջ անցնեն գործի, կարծում եմ, որ այս շարժումը նոր թափ կստանա»,- ասաց Հակոբյանը և հույս հայտնեց, որ առկա խնդիրներն առաջիկայում կկարգավորվեն: