Ադրբեջանը կվերածվի Ռուսաստանի հետ Թուրքիայի մրցակցի. Թոմաս դե Վաալ

Բրիտանացի հայտնի լրագրող, Կարնեգի հիմնադրամի քաղաքական վերլուծաբան Թոմաս դե Վաալը, մեկնաբանելով «Հարավային հոսք» գազային նախագծից Ռուսաստանի հրաժարումը և Սև ծովի հատակով դեպի Թուրքիա նոր գազատար կառուցելու մասին Անկարայի հետ Մոսկվայի ստորագրած նոր համաձայնագիրը, հայտարարել է, որ նոր իրողությունների պայմաններում Ադրբեջանը կվերածվի Ռուսաստանի հետ Թուրքիայի մրցակցի, և նրա եկամուտները կնվազեն:

Ինչպես հաղորդում է «Արմենպրես»-ը' վկայակոչելով արտասահմանյան ԶԼՄ-ները, Թոմաս դե Վաալը հայտնել է, որ «Հարավային հոսք»-ից Մոսկվայի հրաժարումը և Ռուսաստան-Թուրքիա նոր գազային նախագծի իրականացման մասին որոշումն ամբողջությամբ խառնում է արևելյան Եվրոպայի էներգետիկական քարտեզը: Փորձագետը գտնում է, որ «Հարավային հոսքի» չիրականացումից կտուժեն նաև Բուլղարիան ու Սերբիան:

Լրագրողի կարծիքով' գործընթացների նոր վերադասավորումից կշահի Թուրքիան, որն ավելացնելով մատակարարվող ռուսաստանյան գազի ծավալները, կամրապնդի իր էներգետիկ ապահովվածությունը:

Անդրադառնալով Ադրբեջանի գործոնին' Թոմաս դե Վաալը նշել է, որ եթե 5 տարի հետո, ինչպես ծրագրված է, իրականանա TANAP (Անդրանատոլիական գազատար) և TAP (Անդրադրիատիկ գազատար) նախագծերով Թուրքիայի տարածքով ադրբեջանական գազը հարավային Եվրոպա փոխադրելու Ադրբեջանի պլանը, ապա այն կվերածվի Ռուսաստան-Թուրքիա նախագծի մրցակցի:

«Սակայն, Եվրոպայի ուղղությամբ գազի արտահանման մեջ Ադրբեջանի եկամուտները կարող են նվազել, քանի որ Ռուսաստան-Թուրքիա նախագծի մեծ լինելու պատճառով դրա իրականացման մեջ դժվարություններ ծագելու դեպքում, Ռուսաստանը կարող է իր գազը Եվրոպայի շուկաներ հանելու համար օգտվել TANAP-ից»,- մեկնաբանել է նա: