Րաֆֆի Հովհաննիսյանը սպասում է Ծառուկյանի խոսքին

«Ժառանգություն» կուսակցության առաջնորդ Րաֆֆի Հովհաննիսյանը շարունակում է բարձրաձայնել եռյակի ներսում միասնական օրակարգի ձևավորման անհրաժեշտության մասին: Ազատության հրապարակում հրավիրված քաղաքացիական ժողովի ավարտից հետո լրագրողների հետ զրույցում Հովհաննիսյանը նշեց, որ իրենք տարին սկսել են դեռ մնացած մեծ հույսով և հավատով, որ հնարավոր կլինի միասնական հարթակ ստեղծելու եղանակով երկրում փոփոխություններ իրականացնել: «Իհարկե, մեր գործընկերների մոտ կան տարբեր մոտեցումներ թե' արտաքին, թե' ներքին քաղաքականության հարցերում»,- «Արմենպրես»-ի հաղորդմամբ՝ նշեց Հովհաննիսյանը՝ ընդգծելով, որ իրենք պարտավոր են միասնական կերպով հարթակից ժողովրդին ներկայացնել, թե որն է իրենց պատկերացրած Հայաստանը:

Նա վստահություն հայտնեց, որ իրենք առաջիկայում քննարկման առարկա կդարձնեն այս հարցը և հանդես կգան ժողովրդի առջև: «Սակայն, այդ հարթակը պետք է ամբողջական դառնա թե' քաղաքական կուսակցությունների միակարծիք մոտեցմամբ, թե' քաղաքացիական նախաձեռնությունների միացմամբ: Ամեն մեկս պետք է հասկանա, որ դիմացինը մի քիչ տարբեր է, որ ամեն մեկս չունի ճշմարտության մենաշնորհy: Դրա համար մեր գործընկեր կուսակցությունները, քաղաքացիական նախաձեռնությունները պետք է միասին կանգնեն: Մենք մի փոքր ուշացել ենք, սակայն եթե միասին կանգնենք, դա կլինի նոր Հայաստանի սկիզբը»,- ընդգծեց Հովհաննիսյանը:

«Ժառանգության» առաջնորդը նաև նշեց, որ երբ հիմնական քաղաքական ուժերը, այդ թվում նաև Գագիկ Ծառուկյանը և նրա քաղաքական թիմը հրապարակային կկակգնեն ժողովրդի առջև և կպահանջեն իշխանափոխություն, նախագահական և խորհրդարանական արտահերթ ընտրություններ, այդ ժամանակ երկրում նոր իրավիճակ կստեղծվի:

Նա նկատեց, որ «Ժառանգություն»-ը եռյակից դուրս գալու խնդիր չունի, սակայն համագործակցությունը պետք է լինի հրապարակային, միասնական հռչակագրով և պետք է միանան նոր քաղաքական ուժեր և քաղաքացիական նախաձեռնություններ: «Մենք դուրս գալու խնդիր չունենք, սակայն ունենք օրակարգ ճշգրտելու և ամբողջացնելու խնդիր: Մենք պետք է հասկանանք, թե ինչ պիտի առաջարկենք այն ժողովրդին, որին երկու անգամ հրավիրեցինք հրապարակ»,- ընդգծեց նա:

Դիտարկմանը, թե այսօր եռյակի անդամ քաղաքական ուժերի ներկայացուցիչները չեն միասցել իր նախաձեռնած քաղաքացիական ժողովին, Րաֆֆի Հովհաննիսյանն ընդգծեց, որ դա իրենց խնդիրն է, սակայն ինքը գործունեության նման մեթոդաբանություն չունի և միշտ այնտեղ է, որտեղ ժողովրդի շահն է: «Օրինակ՝ ես դեկտեմբերի 10-ին միանալու եմ ՀԱԿ-ի նախաձեռնած երթին՝ նվիրված մարդու իրավունքների պաշտպանությանը: Եվ կոչ եմ անում, որպեսզի բոլորը լինեն միասին, բոլորը բոլորի հետ»,- նշեց նա: