Գեղարքունիքում հարգանքի տուրք մատուցեցին Սպիտակի երկրաշարժի զոհերի հիշատակին

Գեղարքունիքի մարզի Գավառ քաղաքում այսօր` դեկտեմբերի 7-ին, հարգանքի տուրք են մատուցել 1988թ. դեկտեմբերի 7-ի աղետալի երկրաշարժի անմեղ զոհերի հիշատակին: «Արմենպրես»-ի հաղորդմամբ` Գեղարքունիքի մարզպետի տեղակալ Անդրանիկ Հակոբյանը, Գեղարքունյաց թեմի առաջնորդ Մարկոս եպիսկոպոս Հովհաննիսյանը, Գավառի քաղաքապետի տեղակալ Գրիգոր Բոշյանը, Գեղարքունիքի մարզպետարանի և Գավառի քաղաքապետարանի, նրանց ենթակայությամբ գործող կրթամշակութային եւ առողջապահական հաստատությունների աշխատակիցները, Գավառի տարածքի համայնքների ղեկավարները, դպրոցականներ եւ բազմաթիվ քաղաքացիներ ծաղկեպսակներ եւ ծաղիկներ դրեցին Գավառի Սուրբ Աստվածածին եկեղեցու բակում տեղադրված Սպիտակի մեծ երկրաշարժի զոհերի հիշատակը հավերժացնող հուշաքարին:

Ծաղկեդրման արարողությունից հետո մատուցվեց հոգեհանգստյան կարգ' ձեռամբ Գեղարքունյաց թեմի առաջնորդ Մարկոս եպիսկոպոս Հովհաննիսյանի: Հայաստանյան մեծ երկրաշարժի զոհերի հիշատակը հարգվեց նաեւ մոմավառությամբ: «Ավերիչ երկրաշարժի պատճառած հսկայական կորուստները ժամանակի ընթացքում կարող են վերականգնվել, սակայն նրա տված կսկիծը դեռ երկար կմնա ապրողներիս սրտերում, եւ այդ ցավը մեզնից յուրաքանչյուրը կարող է ամոքել միայն ստեղծարար աշխատանքով, ապրելով ու կառուցելով, հայոց հայրենիքը շեն ու խաղաղ պահելով»,-«Արմենպրես»-ի հետ զրույցում նշեց Գեղարքունիքի մարզպետի տեղակալ Անդրանիկ Հակոբյանը: