Մեծ աշխատանք է կատարվել, բայց Գյումրին դեռ խնդիրներ ունի. Ֆելիքս Ցոլակյան

Սպիտակի երկրաշարժից անցել է 26 տարի. Հայաստանի հյուսիսային քաղաքներից ու գյուղերից շատերը տուժեցին: Կորուստը ոչ միայն մարդկային էր, այլ նաև նյութական: Շիրակի մարզպետ Ֆելիքս Ցոլակյանը լրագրողների հետ ունեցած հանդիպման ժամանակ ամփոփելով անցած տարիների ընթացքում կատարված աշխատանքները' նշեց, որ թեև դանդաղ, բայց շատ բան փոխվել է այս ընթացքում: «Շիրակում երկրաշարժի հետևանքով կորցրել ենք մոտ 26 հազար բնակարան: 1988 թվականից հետո Գյումրիում կառուցվել է մոտ 16 հազար բնակարան, «Բնակարանի գնման վկայագիր» ծրագրի միջոցով լուծվել է 5500 բնակարանային խնդիր: Ստացվում է, որ լուծվել է մոտ 21 հազար բնակարանի խնդիր՝ կորցրած 24 հազարի փոխարեն: Գյումրիում բնակչությունը մինչև 1988 թվականը մոտ 230 հազար էր, այսօր գրեթե կեսը, ստացվում է, որ բնակարանային ֆոնդը գրեթե վերականգնված է՝ հաշվի առնելով քաղաքի բնակչության թվի նվազումը: Այս տարի ՀՀ կառավարությունը Գյումրիի անօթևանների խնդրի լուծման համար հատկացրել է 1 մլրդ 500 հազար դրամ գումար՝ «Բնակարանի գնման վկայագիր» ծրագրի շրջանակներում 430 անօթևան ընտանիքի բնականային խնդիր լուծելու համար: Ծրագիրն այս պահին ընթացքի մեջ է»,- «Արմենպրես»-ի հաղորդմամբ' նշեց Շիրակի մարզպետը:

Ֆելիքս Ցոլակյանը, անդրադառնալով Գյումրիում առկա խնդիրներին, նշեց, որ քաղաքում դեռ անելիքներ կան: «Գյումրին, անշուշտ, փոխվել է: Մեծ աշխատանք է կատարվել, բայց Գյումրին ունի նաև խնդիրներ, որոնք լուծման կարիք ունեն: Ճիշտ է, կան երկրներ, որտեղ աղետներից հետո վերականգնման գործընթացն արագ է իրականացվում, դա գալիս է ֆինանսներից, երկրի հնարավորություններից, բայց մեր երկրի միջոցները մի փոքր ավելի սուղ են, գտնվել ենք պատերզմական վիճակում, մեր երկիրը լուրջ խնդիրներ է ունեցել, ինչն էլ բնականաբար, ձգձգել է այդ գործընթացը: Գյումրին ես տեսել եմ 1988 թվականից առաջ, հետո և հիմա: Գյումրին շատ է փոխվել՝ դեպի դրականը: Իհարկե դեռ կան վերքերն ու հետքերը, բայց ժամանակը շատ բան է փոխում»,-ավելացրեց Ֆելիքս Ցոլակյանը: