Գեղագիտության ազգային կենտրոնի Գյումրու մասնաճյուղում սկսել են ուսուցանել համակարչգային դիզայն

Գեղագիտության ազգային կենտրոնի Գյումրու մասնաճյուղն ունի 370 սան, ովքեր ուսանում են նկարչություն, պար, երգ, թատրոն, դիզայն, ձեռքի աշխատանք, գոբելեն: Այս տարի կենտրոնը բարերարներից նվեր ստացավ համակարգիչներ, ինչի շնորհիվ կենտրոնում ստեղծվել է համակարչային դիզայնի խմբակ: Այս մասին «Արմենպրես»-ին տեղեկացրեց Սուսաննա Մկրտչյանը, ով արդեն 36 տարի ղեկավարում է կենտրոնը:

«Գեղարվեստի ակադեմիայի դասախոսական կազմի մի մասը սովորել է մեզ մոտ, իսկ մյուս մասը՝ դասավանդել: Բոլորի աշխատանքային հիմքը դրվել է Գյումրիում: Ծնունդով գյումրեցի ոչ միայն նկարիչներ, այլ նաև հայտնի բժիշկներ, ճարտարապետներ, պատմաբաններ անցել են մեր կենտրոնի կամարներից: Մեր խնդիրը չէ պատրաստել արվեստի մարդ, այլ ճաշակով մարդ, ով կգնահատի արվեստը և կպահպանի այն»,-ասաց Սուսաննա Մկրտչյանը:

Խոսելով Գեղագիտության ազգային կենտրոնի Գյումրու մասնաճյուղում առկա խնդիրների մասին' կենտրոնի ղեկավարը նշեց, որ դրանք շատ են, սակայն անցած տարի մարզպետարանի կողմից անցկացվել է ջեռուցում, մնացել է վերանորոգումը, որը մարզպետարանն ի վիճակի չէր իրականացնել: «Մենք աշխատում ենք մանր խնդիրներն անտեսել, քանի որ այլապես աշխատանքն առաջ չի գնա: Մշակույթն ինքն իրենով շատ խոցելի է և շատ մեծ փոփոխությունների դեպքում, դա լինի պատերազմ, համակարգի փոփոխություն կամ աղետներ, այն իր ազդեցությունն է ունենում մշակույթի վրա: Արվեստն այն բար ոմետրն է, որը ցույց է տալիս ժողովրդի հոգեկան վիճակը: Անցած տարիների ընթացքում շատ բան կորցրեցինք՝ ի դեմս լավագույն ընկերների և մեծ հոգևոր արժեքների: Կորուստներն արագ են լինում, սակայն դրանց վերականգնումը բավականին դանդաղ է տեղի ունենում»,-հավելեց Սուսաննա Մկրտչյանը:

Նախորդ տարի կենտրոնում մեկնարկել են վերանորոգումների աշխատանքները, որոնք իրականացվում են կենտրոնի սեփական ուժերով և սաների ծնողների օգնությամբ, սակայն բաց է մնում տանիքի հարցը, որի վերանորոգման համար Սուսաննա Մկրտչյանը պատրաստվում է նամակով դիմել հանրապետության վարչապատին: Իսկ ընդհանուր առմամբ' Գեղագիտության ազգային կենտրոնի Գյումրու մասնաճյուղի խնդիրները նույնն են, ինչ մնացած արվեստի կենտրոններինը՝ նյութական բազայի սղություն, աշխատավարձերի շատ ցածր լինելը:

Գյուրի քաղաքի Աբովյան փողոցի 216 հասցեում գտնվող «Գեղագիտության ազգային կենտրոն» ՓԲԸ-ի Գյումրու մասնաճյուղտ տեղակայված է 1099,44 քմ ընդհանուր մակերեսով շենքում: Այն 1978թ.-ին քաղաքային գործադիր կոմիտեն անվարձահատույց հատկացրել է կենտրոնին: Պետական բյուջեից կառույցն այժմ ամսական կտրվածքով ստանում է 1.200.000 դրամ, որն ամբողջությամբ նախատեսված է 30 աշխատակիցների աշխատավարձերի համար: Կենտրոնը կայուն եկամուտ չունի. ամսական որոշ պարապմունքների դիմաց ստացած վարձավճարներն են, երբեմն հովանավորիների կողմից փոխանցվող գումարները եւ ժամանակ առ ժամանակ միջոցառումների համար տարածքի վարձակալական գումարը: