«Ադրբեջանը մեկ անգամ ևս ապացուցեց իր ահաբեկչական-ֆաշիստական էությունը». Դավիթ Բաբայան

Ադրբեջանի ահաբեկչական-ֆաշիստական էությունը ապացուցվեց ևս մեկ անգամ՝ դեկտեմբերի 8-ին ղարաբաղա-ադրբեջանական սահմանի արևելյան հատվածում իրականացված դիվերսիոն գործողության ժամանակ: «Արմենպրես»-ի հետ զրույցում ԼՂՀ նախագահի մամուլի խոսնակ Դավիթ Բաբայանն ասաց, որ հայկական կողմի համար նորություն չէ Ադրբեջանի կերպարն ու գործողությունները, սակայն նման գործողություններով հերթական անգամ այդ երկրի ահաբեկչական տեսակն է ամրապնդվում միջազգային հանրության աչքում:

«Սա առաջին դեպքը չէ, և նախորդ բազմաթիվ դեպքերի պես Ադրբեջանի զինուժը հետ է շպրտվել: Ցավոք, գործողությունների արդյունքում հայկական կողմը մեկ զոհ է տվել, ադրբեջանական զոհերի թիվը հասնում է յոթի»,- հայտնեց Դավիթ Բաբայանը՝ հավելելով, որ սահմանին իրավիճակը վերահսկելի է. լարվածություն կա, սակայն սահմանին հայկական զինված ուժերն են իրավիճակի տերը:

«Խուճապ չկա ոչ երկրում, ոչ էլ, առավել ևս, սահմանին: ԼՂՀ պաշտպանական բանակը վերահսկում է իրավիճակն ու խուճապի որևէ առիթ չկա և չի էլ կարող լինել»,- շեշտեց Բաբայանը:

Դեկտեմբերի 8-ին ղարաբաղա-ադրբեջանական շփման գծում ԼՂՀ Պաշտպանության բանակը կանխել է հակառակորդի ձեռնարկած դիվերսիոն գործողությունը: Հայկական կողմը կանխարգելիչ հարված է հասցրել և հակառակորդը 5-7 զոհ է տվել: Հայկական կողմը ունի մեկ զոհ. հակառակորդի կողմից արձակված կրակոցից մահացու հրազենային վիրավորում է ստացել զինծառայող, 1995թ. ծնված Գարիկ Արտեմի Իսպիրյանը: