Քաղաքագետն զգուշանում է ռուս-թուրքական ջերմացումից

Ռուս-թուրքական հարաբերությունների մերձեցումը կարող է լուրջ խնդիրներ առաջացնել Հայաստանի համար եւ հայկական կողմը պետք է փոխի մարտավարությունն ու սկսի հարաբերությունները ջերմացնել նաև ԱՄՆ-ի եւ ՆԱՏՕ-ի հետ: Տեսակետը քաղաքագետ Լևոն Շիրինյանինն է: Նա վստահ է, որ պատմությունը կրկնվելու հավանականություն ունի և ինչպես 1920թ., այնպես էլ հիմա, Հայաստանը կարող է Ռուսաստանի և Թուրքիայի հարաբերությունների մերձեցումից տուժել: «Վնասները կարող են լինել թե՛ քաղաքական, թե՛ ռազմական, թե՛ տնտեսական ոլորտներում»,- դեկտեմբերի 9-ին կայացած ասուլիսի ժամանակ ասաց Շիրինյանը:

Խնդիրներին զուգահեռ, Շիրինյանը չի բացառում նաև այն փաստը, որ Թուրքիայի' Արևելքի և Ռուսաստանի հետ մերձենալը միանշանակ չի ընկալվի ԱՄՆ-ում: «Ես չեմ բացառում, որ եթե ռուս-թուրքական հարաբերությունները շարունակեն զարգանալ, ապա ԱՄՆ-ը և Մեծ Բրիտանիան կճանաչեն նաև Հայոց ցեղասպանությունը: Կամ գուցե, Եվրոպան շահագրգիռ լինի Թուրքիային իր կողմը կանչելու համար նոր ծրագրեր մշակել և խոստումներ տալ: Սրանք թեորիաներ են, որոնք կարող են իրականություն դառնալ, և այդ փոփոխություններին Հայաստանը պետք է պատրաստ լինի»,- ասաց Շիրինյանը:

ՌԴ նախագահ Վլադիմիր Պուտինի այցը Թուրքիա ավարտվել է մի շարք կարեւորագույն համաձայնագրերի կնքմամբ: Դրանցից քննարկման առարկա է հատկապես ռուս-թուրքական գազային համաձայնագիրը, որի մի շարք կետեր և պայմաններ աննախադեպ են: