Մանվելին հաջողվեց պահպանել ԵԿՄ-ի միասնականությունը

Տասը տարի առաջ այս օրը ԵԿՄ հերթական համագումարն էր, որի ընթացքում գեներալ-լեյտենանտ Մանվել Գրիգորյանը վերընտրվեց միության նախագահ:

Ընդհանրապես ԵԿՄ պատմության մեջ դեկտեմբերը նշանակալից է, որովհետև այդ ամսին բաժին են ընկնում մի քանի առանցքային նշանակություն ունեցող համագումարներ:

Մանվել Գրիգորյանը ԵԿՄ նախագահի ղեկավարումն ստանձնել է 1999թ-ի հոկտեմբերի 27-ի եղերական ոճրագործությունից հետո: Երկրապահը կորցրել էր իր առաջնորդին՝ Վազգեն Սարգսյանին ու կարիք ուներ մեկի, ով համախմբող գործոն կդառնար կռված տղերքի համար, կապահովեր ԵԿՄ-ի ու բանակի ներդաշնակ կապն ու միասնականությունը:

Այդ մեկի անունը՝ որպես որոշում, օրվա պահանջ, հնչեց հենց Օպերայի մեծ դահլիճում, որտեղ 1999-ի դեկտեմբերի սկզբին անցկացվում էր ԵԿՄ համագումարը, առաջին անգամ՝ առանց Վազգենի: Գեներալ Մանվելը միության նախագահ դարձավ շարքերի, ֆիդայության միասնական որոշման արդյունքում, ու առնվազն մանկամտություն է ոմանց պնդումը, թե իրենք են համոզել գեներալին ու նրան Երկրապահ բերել:

Մանվել Գրիգորյանը՝ պատերազմի տարիներից սկսած, եղել է Սպարապետի ամենամերձավոր զինակիցներից մեկը ու, բնականորեն, նրան պիտի փոխարիներ ԵԿՄ վարչության նախագահի պաշտոնում:

Վազգենից հետո՝ դժվար էր լինել ԵԿՄ նախագահ, պահպանել միության միասնականությունը, կշիռը: Բայց դա Մանվելին հաջողվեց, որովհետև հրամանատարի, զորավարի կոչումը նա նվաճել էր ռազմի դաշտում:

Սուրեն Սուրենյանց