ՍԴՀԿ «Սարգիս Տխրունի» միության անդամները երիտասարդների հետ քննարկել են նրանց հուզող խնդիրները

ՍԴՀԿ «Սապպահ Գյուլ» կենտրոնում դեկտեմբերի 10-ին հանդիպում է տեղի ունեցել երիտասարդների և ՍԴՀԿ «Սարգիս Տխրունի» ուսանողական-երիտասարդական միության վարչության անդամների միջև: Ինչպես «Արմենպրես»-ին տեղեկացրին ՍԴՀԿ «Սարգիս Տխրունի» միության մամուլի ծառայությունից, ՍԴՀԿ Հայաստանի վարչության փոխատենապետ Վազգեն Մեսրոպյանը, ելույթ ունենալով Ուսանողական միության անդամների առջև, ասել է, որ Ս.Դ. Հնչակյան կուսակցությունը մշտապես ուշադրություն է դարձնում երիտասարդների խնդիրներին, հիշեցրել է, որ ՍԴՀԿ 1887թ.-ին Ժնևում հիմնադրվել է հենց ուսանողների կողմից: «Չմոռանանք, որ Հնչակյան կուսակցության պայքարի 127-ամյա ճանապարհին ՍԴՀԿ-ի հեղափոխական դրոշը միշտ բարձր պահել և հանուն հայրենիքի ազատագրական պայքարում զոհվել են բազմաթիվ երիտասարդներ»,- նկատել է Վազգեն Մեսրոպյանը:

Վերջինիս խոսքերով էլ, այժմ ՍԴՀԿ-ի պայքարը հանուն երիտասարդների իրավունքների է, որ ոտնահարվում են ամեն քայլափոխի: Նա նաև հավելել է, որ ՍԴՀԿ պայքարը՝ ընդդեմ օլիգարխիայի և հանուն սոցիալական արդարության, նախ և առաջ երիտասարդների համար է:

Ուսանողական-երիտասարդական միության վարչության անդամ Ռոման Ծատինյանը, դիմելով երիտասարդներին, հայտարարել է, որ Հայաստանում երիտասարդների և, ի մասնավորի, ուսանողների աշխատանքի տեղավորման հարցը գտնվում է ծանրագույն իրավիճակում: «Երիտասարդներին աշխատանքի վերցնելու համար այնպիսի պայմաններ են առաջ քաշում գործատուները, որ դիմելն ուղղակի անիմաստ է դառնում: Նոր ավարտած մագիստրոսից արդեն իսկ պահանջում են եռամյա աշխատանքային փորձ: Ողբերգություն է, որ մեր երկրում դեռևս աշխատանքային շուկան նման անհեթեթ պահանջներ է առաջ քաշում»,- նկատել է նա:

Երիտասարդների խոսքերով, իրենք, ավարտելով բարձրագույն ուսումնական հաստատությունները, որպես կանոն, աշխատում են ոչ իրենց մասնագիտությամբ, ուստիև շատ դեպքերում ստիպված են լինում աշխատանք գտնել արտերկրում:

Ռոման Ծատինյանը, համաձայնվելով այդ դիտարկումների հետ, հավելել է, որ գործատուն ոչ մի կերպ չի մտնում բարձրագույն ուսումնական հաստատություններ: «Ամբողջ աշխարհում ընդունված է, որ մեծ կորպորացիաները արդեն 2-րդ կամ 3-րդ կուրսերից գտնում են իրենց ապագա աշխատակիցներին, վճարում նրանց ուսման վարձը՝ պայմանով, որ հետագայում աշխատելու են հենց իրենց մոտ: Սա նորմալ, ընդունված պրակտիկա է: Մենք առաջիկայում պատրաստում ենք օրենսդրական բարեփոխումների փաթեթ, որը ներկայացնելու ենք հանրային քննարկման և ուղարկելու ենք ԱԺ բոլոր խմբակցություններին: Պ ետք է այս հարցերին ցուցաբերել ինստիտուցիոնալ մոտեցում»,-ասել է ՍԴՀԿ «Սարգիս Տխրունի» միության ներկայացուցիչը: