Վահրամ Մկրտչյանը չի հավատում եռյակի հաջողությանը

Ազգային ժողովի Հանրապետական խմբակցության պատգամավոր Վահրամ Մկրտչյանը եռյակի նախաձեռնած շարժումը համաժողովրդական չի համարում: «Արմենպրես»-ի հետ զրույցում պատգամավորը նկատեց, որ միավորվել են երեք քաղաքական ուժեր, որոնք նույնիսկ մինչև հիմա չեն հստակեցրել իրենց քաղաքական օրակարգը: «Նրանք դեռ չգիտեն, թե ինչի համար են միավորվել, ինչի համար են միասին պայքարում: Մեկին թվում է, թե մեկը շահագործում է մյուսին, որպեսզի գերակա դիրքեր ունենա, մեկ ուրիշին էլ թվում է, թե ինքն է մյուսներին շահագործում: Իրենք միմյանց մեջ հարաբերությունները չճշտած՝ դուրս են եկել և պայմաններ են ներկայացնում «Հանրապետական» կուսակցությանը՝ 12 կետեր և այլն»,- նշեց Մկրտչյանը:

Պատգամավորը եռյակի անդամ քաղաքական ուժերին խորհուրդ տվեց նախ վերանայել, թե իրենք ով են, ինչ քաղաքական անցյալ ունեն, ինչ են արել իրենք Հայաստանի համար, նոր միայն բարձրաձայնեն արժեքների մասին, որոնք հիմք կհանդիսանան համաժողովրդական շարժման համար: «Իսկ այս պահին Հայաստանում այդպիսի շարժում չկա: Դրա մասին է խոսում նաև այն հանգամանքը, որ դեկտեմբերի 14-ին հանրապետության բազմաթիվ համայնքներում տեղի ունեցան ընտրություններ, որոնց մասնակցել է միայն Հանրապետական կուսակցությունը: Դե եթե համաժողովրդական շարժում են սկսել, թող այդ շարժումն սկսած քաղաքական ուժերից որևէ մեկը մասնակցեր այդ ընտրություններին: Ապրիորի չի կարելի մտքեր արտահայտել, որոնք հետագայում արժեզրկվելու են, իսկ իրենք մնալու են քաղաքական լուսանցքից դուրս»,- նշեց Մկրտչյանը:

Նրա խոսքով' եթե եռյակը չփոխի իր գործելաոճը, որևէ հաջողության չի կարող հասնել: «Նրանք պետք է ներկայացնեն, թե ինչպիսի Հայաստան են ուզում, որից հետո կարողանան ցույց տալ, թե իշխանությունները այդպիսի Հայաստանի կայացմանն ինչով են խոչընդոտում: Այս դեպքում, գուցե, նրանք ինչ-որ հաջողություն ունենան: Սակայն նրանք ոչինչ չեն ներկայացնում, այլ ասում են եկեք անցնենք 100 տոկոսանոց համամասնական ընտրակարգի, բարձրացնենք թոշակները: Է ո՞վ չի ցանկանում թոշակները բարձրացնել: Կամ ասում են եկեք արագաչափերի տուգանքները փոխենք: Մենք դա փոխեցինք. Յուրաքանչյուր գերազանցած կիլոմետրի համար սահմանեցինք 1000 դրամ, մեղմացրեցինք տուգանքները, սակայն դրանով չէ, որ մեր երկրի խնդիրները պետք է լուծվեն»,- ասաց պատգամավորը:

Նա ընդգծեց, որ սովորաբար ընդդիմությունը և իշխանությունը միմյանց փոխլրացնում են: Նրա խոսքով՝ լավ է, որ ընդդիմությունը ակտիվ է լինում: «Ինչքան ընդդիմությունն ուժեղ լինի, այնքան ուժեղ կլինի իշխանությունը: Որքան ընդդիմությունը բացահայտի իշխանության թերությունները, այնքան իշխանությունը կփորձի դրանք վերացնել, իսկ եթե չվերացնի այդ խնդիրները, ապա դրանք կխորանան և հերթական ընտրություններում իրենց հաղթանակը կասկածի տակ կդնեն: Իշխանությունը և ընդդիմությունը պետք է միշտ միմյանց հետ համագործակցեն պետական կարևոր նշանակության հարցերում: Մեկի թերացումը մյուսի վրա անդրադառնում է: Ինչպես մեդալի երկու երես՝ իշխանությունն ու ընդդիմությունը միմյանց շատ փոխկապակցված են»,- ասաց Վահրամ Մկրտչյանը:

Խորհրդարանական երեք ուժերը' «Ժառանգությունը», Հայ ազգային կոնգրեսն ու «Բարգավաճ Հայաստան» կուսակցությունը, հայտարարել էին, որ հանրահավաքային պայքար են սկսել: Նրանք արդեն երկու հանրահավաք են արել (հոկտեմբերի 10-ին և 24-ին), նաև երթ ու ժողովրդական ժողով' դեկտեմբերին, սակայն դեռևս միասնական օրակարգ չունեն: ՀՅ Դաշնակցությունը, որն ավելի վաղ որոշ հարցերի շուրջ համագործակցում էր երեք ուժերի հետ' լքեց քառյակը' ընդգծելով, որ կողմ է Սահմանադրական բարեփոխումներին և չի կարող հարթակում գտնվել այն ժամանակ, երբ մյուս ուժերը դեմ են արտահայտվում այդ բարեփոխումներին: