Դատապարտելի է

Ազգային ժողովի ՀԱԿ խմբակցության քարտուղար Արամ Մանուկյանը հոսպիտալացվել է: Նրա մոտ ախտորոշվել է ուղեղի ցնցում և սալջարդ: Լուրեր.com-ի հետ զրույցում ԲՀԿ մամուլի խոսնակ Տիգրան Ուրիխանյանն, անդրադառնալով կատարվածին, ասաց. «Ի՞նչ կարող եմ ասել, բացի նրանից, որ ցավալի է, դատապարտելի է: Ուզում եմ հուսալ, որ իրավապահները հավուր պատշաճի կաշխատեն և արագ բացահայտում կապահովեն, իսկ մեղավորները պիտի դատապարտվեն»:

Հարցին, թե ըստ իրեն սա կարո՞ղ է կապ ունենալ Արամ Մանուկյանի քաղաքական գործունեության հետ, Ուրիանյանն ասաց, որ չի կարող հարցին պատասխանել, քանի որ չունի ինֆորմացիա, նյութերին չի տիրապետում. «Այս պահին անհրաժեշտ է արագ բացահայտել և պատժել մեղավորներին: Այդ ժամանակ պարզ կլինի»,- ասաց Ուրիխանյանը:

Հարցին, թե ինչո՞վ են պայմանավորված վերջին օրերին իրար հաջորդող միջադեպերը՝ ակտիվիստների ավտոմեքենաների հրդեհումը, ակտիվիստին, Արամ Մանուկյանին և ազատամարտիկներին ծեծի ենթարկելը, Ուրիխանյանն ասաց.

«Որևէ ինֆորմացիա չունենալով՝ չեմ կարող պատասխանել: Ենթադրությունների տիրույթ չեմ կարող մտնել: Իրավապահ մարմիններ գոյություն ունեն, ովքեր աշխատավարձ են ստանում պետական բյուջեից: Նրանց պարտքն է արագ բացահայտել: Երբ կիմանանք՝ ովքեր են մեղավոր, դրդապատճառները կիմանանք, գործի նյութերին կտիրապետենք, այդ ժամանակ կտամ մեկնաբանություն»:

Նշենք, որ ԱԺ պատգամավոր Արամ Մանուկյանի նկատմամբ դեկտեմբերի 11-ի երեկոյան կիրառված բռնության դեպքի առթիվ նյութեր են նախապատրաստվում Արաբկիրի քննչական բաժնում: Նշանակվել է դատաբժշկական փորձաքննություն, հանձնարարություն է տրվել ոստիկանության օպերատիվ-հետախուզական մարմիններին՝ միջոցներ ձեռնարկել առերևույթ հանցագործություն կատարած անձի ինքնությունը պարզելու ուղղությամբ:

Դեպքի վայրի զննությամբ պարզվել է, որ տարածքում առկա է նաև տեսանկարահանող սարք, որի տեսագրությունը հետազոտվում է վարույթն իրականացնող մարմնի կողմից: