Բաքվում Խադիջա Իսմայլովայի ձերբակալությունը մտահոգություն է առաջացրել Լատվիայում

«Ազատություն» ռադիոկայանի Բաքվի գրասենյակի լրագրող Խադիջա Իսմայլովայի ձերբակալությունը լուրջ խնդիր է, և ԵՄ-Ադրբեջան խորհրդի նիստի ժամանակ Եվրամիության նախագահությունը ստանձնած Լատվիան Բաքվի հետ կքննարկի Ադրբեջանում խոսքի ազատության և մարդու իրավունքների հարցերը: Երևանում դեկտեմբերի 12-ին այս մասին հայտարարեց Լատվիայի ԱԳ նախարար Էդգարս Ռինկևիչսը' հավելելով, որ լրագրողի ձերբակալությունը լուրջ մտահոգություն է առաջացրել Լատվիայում:

«ԵՄ-ն երկխոսություն է իրականացնում Արևելյան գործընկերության բոլոր երկրների հետ, որը ներառում է օրենքի գերակայությունը, խոսքի ազատությունը, մարդու իրավունքների պաշպանությունը: Անհանգստացած ենք նորությամբ, որ լրագրող է ձերբակալվել և պատարստվում ենք քննարկել այս հարցը ԵՄ-Ադրբեջան երկխոսության շրջանակում: Հուսով ենք, որ հիմնարար ազատությունները կհարգվեն: ԱլԳ-ն ոչ միայն տնտեսական համագործակցություն է ենթադրում, այլև քաղաքական երկխոսություն և արժեքների համակարգ, որը կիսում ենք. քաղաքական և ԶԼՄ-ների ազատությունն այդ արժեքների մասն են կազմում»,- շեշտեց Էդգարս Ռինկևիչսը:

Բաքվի Սաբաիլ շրջանի դատարանը «Ազատության» լրագրող Խադիջա Իսմայլովային երկու ամսով կալանավորելու որոշում է կայացրել: Նրան կալանավորելու միջնորդությամբ դատարան էր դիմել Ադրբեջանի դատախազությունը: