Հարձակում Կոնգրեսի Հրազդանի տարածքային կառույցի ղեկավարի վրա (լրացված)

Անհայտ անձինք հարձակվել են Հայ ազգային Կոնգրեսի Հրազդանի տարածքային կառույցի ղեկավար Աշոտ Փիլիպոսյանի վրա: Lurer.com-ի թղթակցի հետ զրույցում ոստիկանության հասարակայնության հետ կապերի և լրատվության վարչության պետ Աշոտ Ահարոնյանն ասաց, որ ոստիկանությունը դեպքի առթիվ հաղորդում ստացել է: 

«Հանգամանքները պարզվում են: Անհրաժեշտ միջոցառումներ են ձեռնարկվել»,- ասաց Ահարոնյանը:

Նշենք որ նման դեպք արձանագրվել է նաև երեկ. հարձակման էր ենթարկվել «Հայ Ազգային Կոնգրես» կուսակցության փոխնախագահ, ԱԺ պատգամավոր Արամ Մանուկյանը:

Ավելի ուշ ոստիկանությունը տարածել է տեղեկատվություն, ըստ որի ոստիկանության ծառայողների ձեռնարկած միջոցառումների շնորհիվ կարճ ժամանակում պարզվել իրողությունը.

Դեկտեմբերի 12-ին, ժամը 19.30-ի սահմաններում, ոստիկանությունում ահազանգ է ստացվել, որ Հրազդան քաղաքի Միկրոշրջան թաղամասի շենքերից մեկի բակում ծեծի է ենթարկվել Հայ ազգային կոնգրեսի Հրազդանի տարածքային կառույցի ղեկավար Աշոտ Փիլիպոսյանը:

Ոստիկանության Կոտայքի մարզային վարչության և Հրազդանի բաժնի ծառայողների ձեռնարկած միջոցառումների շնորհիվ կարճ ժամանակում պարզվել է կասկածյալների ինքնությունը' Կոտայքի մարզի Լեռնանիստ գյուղի բնակիչներ Պարգև և Ռոման Պողոսյաններ:

Ոստիկանության ծառայողների ձեռնարկած միջոցառումների և բացատրական աշխատանքների շնորհիվ Պողոսյանները ներկայացել են ոստիկանության Հրազդանի բաժին և խոստովանել, որ Աշոտ Փիլիպոսյանի հետ իրենք են վիճաբանել միմյանց անձնական վիրավորանք հասցնելու պատճառով:

Կատարվում է քննություն: