Հայ հնագետը վերականգնել է եգիպտացի փարավոնի արձանը

Հայ հնագետ Հուրիկ Սուրուզյանը և եգիպտացի մասնագետ Աբդելքարիմ Քարարի հետ ներկայացրել է փարավոն Ամենհոթեփ 3-րդի՝ իրենց կողմից վերականգնված քանդակներից մեկը: Ինչպես հաղորդում է «Արմենպրես»-ը՝ վկայակոչելով Horizon Weekly-ն, արարողությանը ներկա է եղել նաև Եգիպտոսի հնությունների նախարար Մամդուհ ալ Դամաթին: Ամենհոթեփի երկու հսկակայական արձանները ոչնչացվել էին մ.թ.ա. 1200 թվականին երկրաշարժի հետևանքով: Դրանք բաժանվել էին 200 մասի: Դրանք վերականգնելու նախագիծը իրականացվել է երկու փուլով՝ մեկ տարվա ընթացքում, ինչը յուրահատուկ նվաճում պետք է համարել:

Արձանների վերականգնման առաջին փուլի արդյունքում, որը տևել է 2014 թվականի հունվարից մարտը, այդ հուշարձանների 200 մասերը դուրս են բերվել ջրից և տեղափոխվել են 50 մետր դեպի ցամաք: Դրանցով վերականգնվել է փարավոնին պատկերող առաջին հուշարձանը, որն ունի 12.35 մետր բարձրություն:

Նոյեմբերին իրականացված երկրորդ փուլի արդյունքում վերականգնվել է Ամենհոթեփի երկրորդ հուշարձանը, որն ունի 12.93 մետր բարձրություն և կշռում է 110 տոննա: «Սա հսկայածավալ հուշարձանների լավագույն վերականգնումն է աշխարհում»,- նշել է գործողությունները համակարգող տեխնիկական տնօրեն, իսպանացի հնագետ և ռեստավրատոր Միգել Անխել Լոպեսը:

Հուրիկ Սուրուզյանի գլխավորած հնագիտական արշավախումբն Ամենհոտեփ 3-րդի արձանի բեկորները հայտնաբերել է 2011թ. մայիսին Նեղոս գետի արևմտյան ափին: Այն գտնվել է փարավոնի դամբարան-տաճարի պեղումների ժամանակ: Արձանը հայտնաբերվել է Քոմ էլ-Հեթթանում գտնվող փարավոնի դամբարանի երրորդ սյան մոտ: