Շմայսի վարորդը՝ Արամ Մանուկյանին ծեծելու մասին

ԱԺ պատգամավոր Արամ Մանուկյանի դեմ հարձակում գործած Արամ Սվազյանը 2011 թվականին Մալաթիա-Սեբաստիա համայնքների առաջին ատյանի դատարանի կողմից դատապարտվել է երեք տարի ազատազրկման՝ մաքսանենգության մեղադրանքով: 

Այս մասին տեղեկանում ենք Դատական տեղեկատվական համակարգից: Գրում է «ՀԺ»-ն:

«Սվազյանը մեղավոր է ճանաչվել այն բանի համար, որ 2010 թվականին փորձել է Դուբայ-Երեւան չվերթով մաքսանենգ ճանապարհով ՀՀ ներմուծել ադամանդներ՝ 68 միլիոն 859 հազար ՀՀ դրամ արժողությամբ: ՀՀ անկախության հռչակման 20-րդ տարեդարձի կապակցությամբ համաներում հայտարարելու մասին 2011 թվականի մայիսի 26-ի ԱԺ որոշմամբ Արշակ Սվազյանը ազատվել է պատժի կրումից: Հետաքրքիր է, որ նախաքննության եւ դատաքննության ընթացքում Սվազյանը կալանքի տակ չի եղել եւ նրա նկատմամբ խափանման միջոց է ընտրված եղել բնակության վայրից չհեռանալու ստորագրությունը: Հիմա էլ, Արամ Մանուկյանի դեմ հարձակման գործով, Սվազյանը գտնվում է ազատության մեջ, որովհետեւ նրա նկատմամբ խափանման միջոց է ընտրվել կրկին ստորագրությունը՝ բնակավայրից չբացակայելու մասին: Պատճառն այն է, որ պատգամավորի դեմ հարձակման դեպքով գործ է հարուցվել մի հոդվածով, որով առավելագույն պատժաչափը երկամսյա կալանքն է:

***

ՀՀ Ազգային ժողովի պատգամավոր, Հայ Ազգային Կոնգրես կուսակցության փոխնախագահ Արամ Մանուկյանի վրա հարձակում կատարելու մեջ կասկածվող 41-ամյա Արշակ Սվազյանը ազատ է արձակվել. վերջինս քրեական գործով ներգրավվել է որպես կասկածյալ եւ նրա նկատմամբ խափանման միջոց է ընտրվել բնակավայրից չհեռանալու մասին ստորագրությունը:

Այս մասին երեկ, ի պատասխան մեր հարցի, ասացին ՀՀ քննչական կոմիտեից: Գործով որպես կասկածյալ ներգրավված Արշակ Սվազյանը բերման էր ենթարկվել ոստիկանություն դեկտեմբերի 14-ին՝ ժամը 7.30-ի սահմաններում, Երեւանի Ծովակալ Իսակովի 30 հասցեից: Պատգամավոր Արամ Մանուկյանը հարձակման էր ենթարկվել դեկտեմբերի 11-ի երեկոյան: Միջադեպը տեղի էր ունեցել շենքի մուտքում. երբ պատգամավորը մտել է շքամուտք, կասկածյալը հարվածել է նրա դեմքին եւ դիմել փախուստի: Դեպքի առթիվ ՀՀ քննչական կոմիտեի Արաբկիրի քննչական բաժնում հարուցվել է քրգործ՝ ՀՀ ՔՕ 117 հոդվածով (Դիտավորությամբ առողջությանը թեթեւ վնաս պատճառելը՝ առավելագույն պատժաչափը երկամսյա կալանք):

Արշակ Սվազյանը եւ նրա երկու երեխաները հաշվառված են Արագածոտնի մարզի Թաթուլ գյուղում, բայց բնակվում են Երեւան քաղաքում, Հարավ-Արեւմտյան Բ-1 թաղամասում (Րաֆֆու փողոց): Նրանց շենք մուտք գործելու համար անհրաժեշտ էր ծածկագիր հավաքել: Մեր այցելության պահին Արշակ Սվազյանը տանը չէր, մեզ դիմավորեց դուստրը, ով ասաց, որ հայրն ազատ արձակվելուց հետո դեռ տուն չի գնացել: Պատասխանելով մեր մի քանի հարցերին՝ դուստրն ասաց, որ հայրը Մոսկվայում բիզնես ունի, գնում-գալիս է: Թե ի՞նչ բիզնեսի մասին է խոսքը՝ մանրամասնել չցանկացավ: Այնուամենայնիվ, մեզ հաջողվեց դստեր միջոցով կապ հաստատել Արշակ Սվազյանի հետ: Նա մեր զրույցում խոստովանեց, որ ինքն է դեկտեմբերի 11-ի ուշ երեկոյան հարվածել պատգամավոր Արամ Մանուկյանին: Հարվածելու պատճառը, ըստ նրա, այն էր, որ Մանուկյանը հայհոյել է իր հրամանատարին (Սերժ Սարգսյանին - հեղ.): Հիշեցնենք, որ սույն թվականի սեպտեմբերի 24-ին Աբովյանում ոչ իշխանական եռյակի առաջին մարզային հանրահավաքի ժամանակ Արամ Մանուկյանն ասել էր. «Բայց կա մի ուրիշ ժողովուրդ, որի համար ես հպարտ եմ, դա ձեր տեսակն է, որ ասում է՝ Սերժի տիրոջ մերն էլ, Սաշիկինն էլ, Միշիկինն էլ, երկրի տերը ես եմ»:

Շարունակելով իր խոսքը՝ Սվազյանն ասաց. «Ես ազատամարտիկ եմ, 1989 թվականին մասնակցել եմ պատերազմի, իմ հրամանատարը եղել է ներկայիս նախագահ Սերժ Սարգսյանը: Ռուսաստանում էի, երբ ինտերնետով տեսա Արամ Մանուկյանին, լսեցի իր հայհոյանքները իմ նախագահի հասցեին, ինչի դա քի՞չ բան է մի հատ հայրենասիրական ապտակ հասցնելու համար: Եկա Հայաստան, ու պահը ստացվեց: Եթե պետք լինի նստել, ես կնստեմ, սա թասիբի հարց էր»: Մեր հարցին, թե ինչպե՞ս է իմացել Արամ Մանուկյանի բնակության հասցեն, Սվազյանը ասաց, թե մանրամասն այդ մասին ցուցմունք է տվել եւ ոչինչ չունի ավելացնելու»,- գրում է թերթը:

Շարունակությունը՝ թերթի այսօրվա համարում: