Ստեփանակերտում օրակարգային է հրետակոծությունից տուժած շենքերի վերանորոգումը

Ստեփանակերտի քաղաքապետ Սուրեն Գրիգորյանը 2014թ. հաջողված է համարում հատկապես քաղաքի զարգացման և վերակառուցման հարցերի իրականացման առնչությամբ: Ծրագրերի մեծ մասն իրականություն է դարձել, մի շարք հիմնախնդիրներ լուծվել են: «Արմենպրես»-ի հետ զրույցում Գրիգորյանն առաջին հերթին մատնանշում է հատկապես այն հանգամանքը, որ հաջողությամբ ավարտին է հասցվել քաղաքի ջրամատակարարման խնդիրը: «Դա ամենակարևոր հարցն է, որի լուծման ուղղությամբ կառավարության հետ համատեղ աշխատել ենք մի քանի տարի շարունակ: Կարելի է ասել, որ Ստեփանակերտի գլխավոր հիմնախնդիրը լուծված է»,-ասում է Գրիգորյանը՝ հավելելով, որ տարվա ընթացքում ուշադրություն է դարձվել նաև կանաչապատ տարածքների ստեղծմանը, նոր աղբավայրերի կառուցմանն ու քաղաքի լուսավորության ապահովմանը:

«Ստեփանակերտի անգամ ծայրամասային փողոցում կա լուսավորություն և այս առումով նույնպես մայրաքաղաքը նոր շունչ ու տեսք է ստացել»,- ասաց Գրիգորյանը:

Գլխավոր հարցը, որ հաջորդ տարվանից լինելու է քաղաքապետարանի և կառավարության օրակարգում՝ քաղաքի կոյուղագծերի փոփոխումն է: Կոյուղագծերը չեն փոխվել վերջին 30-40 տարիներին և այժմ կոյուղագծերի, խողովակների փոխումը դարձել է հրամայական:

«Կոյուղագծերի նորոգումն ու փոխումն ամենամեծ հարցն է: Արդեն երկու տարի է քննարկում ենք այս հարցը, սակայն չէինք կարող աշխատանքներ սկսել, քանի դեռ ջրամատակարարման հարցը կարգավորված չէր: Հաջորդ տարվանից կսկսվի կոյուղագծերի փոխման աշխատանքը, անհրաժեշտ է նոր կոալեկտորների կառուցում, նոր խողովակների տեղադրում: Սա հսկայական ծրագիր է, որը կպահանջի երկար ժամանակ և ֆինանս»,- ասաց Գրիգորյանը՝ հավելելով, որ ծրագրի իրականացման համար կպահանջվի մինչև հինգ միլիարդ դրամ: Քաղաքապետարանի բյուջեն, որ հաջորդ տարի կկազմի մեկ միլիարդ հինգ հարյո ւր միլիոն դրամ՝ չի կարող միայնակ լուծել այդ խնդիրը:

Բացի կոյուղագծերի փոխումից, նախատեսվում է նաև մայրաքաղաքի ճանապարհների ասֆալտապատում:

«Իրականացնելու ենք մեծ ծրագիր փողոցների բարեկարգման և ասֆալտապատման առումով: Ստեփանակերտում օրակարգային է համարվում բնակարանների վերանորոգման հարցը: Մայրաքաղաքում դեռևս կան հրետակոծությունից տուժած շենքեր: Մեր ուշադրության կենտրոնում է մոտ հինգ հարյուր բնակարան, որոնցից երկու հարյուրը տուժել են հրետակոծության հետևանքով, իսկ մնացած երեք հարյուր բնակարանն էլ պատկանում են զոհված ազատամարտիկների ընտանիքներին»,- եզրափակեց Գրիգորյանը:

Հասմիկ Հարությունյան