«Արմենպրես»-ը 96 տարեկան է. 1918 թվականից Հայաստանի հետ

Հասարակություն 18 Դեկտեմբեր, 2014 12:38

Հայաստանի ամենահին լրատվական գործակալությունը' «Արմենպրես»-ը, նշում է հիմնադրման 96 ամյակը: Ինչպես սիրում են ասել գործակալության աշխատակիցները, այս «երիտասարդ ծերուկն», իր գոյության երկար ու ձիգ տարիների ընթացքում, երբեք չհիասթափեցրեց իր հավատարիմ ընթերողներին: «Արմենպրես»-ը եղել և մնում է հայկական լրատվությա ն դաշտի այն ակնառու ներկայացուցիչներից մեկը, ով մշտապես իր ընթերցողներին ապահովել է ստույգ և հավաստի տեղեկատվությամբ:

Դեկտեմբերի 18-ն «Արմենպրես»-ի հիմնադրման օրն է: 1918թ. Հայաստանի Ազգային խորհրդի հենց այդ օրվա նիստի արձանագրությունում ազդարարվեց Հայաստանի նորանկախ պետության համար մեծ իրադարձություն հանդիսացող Հայաստանի հեռագրական գործակալության ծնունդը: Վերջինիս հիմնման վերաբերյալ առաջին օրենքի ընդունմամբ երկրի բոլոր պետական ու հասարակական հիմնարկները պարտավորվել են տեղեկություններ տալ գործակալությանը, ընդ որում' արգելվել է նախքան դրանք գործակալությանը հաղորդելը տալ մասնավոր անձանց կամ հաստատություններին, ինչպես նաեւ գործակալության հեռագրերի արտատպումն այլ հրատարակություններում' բաժանորդ թերթերում դրանց հրապարակումից հետո 48 ժամվա ընթացքում: Հայհեռագործի առաջին պաշտոնական հեռագրային ժապավենը, ինչպես եւ նախօրոք ծանուցվել է բաժանորդներին, թողարկվել է 1919թ. հունվարի 15-ին. այն ընդգրկել է 22 կարճ լուր: Դրանք ուշագրավ տեղեկություններ են հանրապետության առօրյայի, պետական շինարարության, ազգամիջյան փոխհարաբերություններում գլուխ բարձրացնող ներքին խժդժությունների մասին: «Հայհեռագործ-Արմենտա-Արմենպրես»-ն իր գոյության ավելի քան ինը տասնամյակների ընթացքում ունեցել է երեսունից ավելի ղեկավարներ, մշտապես արտահայտել է հասարակության ցավերն ու մտահոգությունները. նա ժողովրդի հետ պայքարել է ֆաշիզմի դեմ, ուրախությամբ արձանագրել հետպատերազմյան շրջանում հայորդիների ներգաղթը, անմասն չի մնացել մշակութային կյանքում տեղի ունեցող իրադարձություններից: 1959-ի դեկտեմբերից գործակալությունն ունենում է նաեւ իր առանձին, մասնագիտացված ֆոտոծառայությունը' «Ֆոտոխրոնիկա-ՀՀԳ» անվամբ, որ կարճ ժամանակում մեծ համբավ է ձեռք բերում: Հետագայում որոշվում է փոխել հնաբույր Հայաստանի հեռագրական գործակալություն անվանումը: Հայտարարվում է անվանափոխման մրցույթ: Ներկայացված ամենատարբեր առաջարկություններից ընտրվել է «Արմենպրես»-ը:

Իր գոյության տարիների ընթացքում գործակալությունը մշտապես աչքի է ընկել իր բարձր որակներով, ինչը փաստում են ոչ միայն տեղական, այլև օտարերկրյա առաջատար ԶԼՄ-ների ներկայացուցիչները: 2014 թվականին «Արմենպրես»-ը ստանձնեց Մերձսևծովյան երկրների ազգային լրատվական գործակալությունների ասոցիացիայի (BSANNA) նախագահությունը: Միաժամանակ, Հայաստանի պետական լրատվական գործակալությունը կարողացավ Երևանում պատվով ու բարձր մակարդակով կազմակերպել BSANNA-ի 7-րդ գագաթնաժողովը և ԱՊՀ երկրների պետական լրատվամիջոցների ղեկավարների խորհրդի 19-րդ նիստը: