Հարկավոր է զբաղվել ոչ միայն մարմնի, այլև մտքերի հիգիենայով. Դալայ լամա

Դալայ լաման մոլորակի վրա խաղաղության հանգուցային պայմանների թվում նշել է մտքի խաղաղությունը, այն բանի ըմբռնումը, որ անհնարին է երջանիկ լինել միայնության մեջ և մյուսների հաշվին, հույզերը վերահսկելու կարողությունը, համբերելը, կարեկցելը և սիրելը:

«Ամեն տարի հավաքվում է Նոբելյան դափնեկիրների կոմիտեն, երբեմն ես նույնպես մասնակցում եմ այդ ժողովներին, որտեղ մենք խոսում ենք խաղաղության մասին: Խաղաղությունն ի վերջո հանգում է մտքի խաղաղությանը: Եթե միտքը լի է մոլություններով, զայրույթով, ապա շատ դժվար է մոլորակի վրա խաղաղության հասնել: Երկրի յուրաքանչյուր բնակիչ պատասխանատու է այս աշխարհի համար: Եթե մենք միայն մեր մասին ենք մտածում, մենք չենք կարող երջանիկ ապրել. մյուսներն ավելի շատ են. նրանք 7 միլիարդ են»,- Դելիում Ռուսաստանի բուդդիստների ուսուցման ընթացքում ասել է Դալայ լաման, որը 25 տարի առաջ Խաղաղության Նոբելյան մրցանակ է ստացել, տեղեկացնում է «Արմենպրես»-ը:

Նա նշել է, որ յուրաքանչյուր մարդու երջանկությունը կախված է իր մտքի խաղաղեցումից, բայց հնարավոր չէ երջանիկ լինել միայնության մեջ, երբ մնացածները տառապում են: «Մեր երկիրը մեր ընտանիքն է, մեր տունը: Շատ կարևոր է զգալ, որ 7 միլիարդը մենք ենք, մի ամբողջություն»,-նշել է բուդդայականների առաջնորդը:

Նրա խոսքով, բոլոր կենդանի էակները, ընդհուպ մինչև միջատները, չեն ցանկանում տանջվել և ցանկանում են ճաշակել երջանկությունը: Բայց կենդանիներն ի վիճակի չեն միտքն աշխատեցնել այն չափով, որքան մարդը, և նրանք հիմնականում զգայական հաճույքի են ձգտում:

Դալայ լաման նշել է, որ մտքի խաղաղության հասնելու համար մարդուն օգնում են սերը, կարեկցանքը, համբերությունը, քչով բավարարվելու կարողությունը, ինքնակարգապահությունը՝ այն, ինչի մասին դրվատանքով է խոսվում կրոնական բոլոր ուսմունքներում, և ինչը նպաստում է ինչպես մենթալ, այնպես էլ ֆիզիկական առողջությանը:

Վկայակոչելով ԱՄՆ-ում անցկացված գիտափորձերի արդյունքները՝ Դալայ լաման հավաստիացրել է, որ «կարեկցանքը նվազեցնում է սթրեսի մակարդակը և արյան ճնշումը, լավացնում է հաղորդակցությունը մարդկանց խմբում, մարդկանց պարգևում է երջանկության զգացում»:

«Գլխավորը միտքը վերահսկելն է: Մարդու ուղեղը կարող է փոխվել մարզումների օգնությամբ, քանի որ այն օժտված է նեյրոհարմարվողականությամբ»,- ասել է հոգևոր առաջնորդը:

Նա ընդգծել է կրթության կարևորությունը, քանի որ տգիտությունը չարիքի աղբյուրն է: «Կարևոր է, որ մարդիկ ուսումնասիրեն ուղեղի աշխատանքը: Մենք մարմնի հիգիենա ենք ուսուցանում, բայց չէ որ հարկավոր է զբաղվել նաև մտքերի հիգիենայով»,-հավելել է Դալայ լաման, հաղորդել է ՌԻԱ Նովոստի գործակալությունը: