Ադրբեջանի երկրորդ զբոսաշրջային քաղաքը զարգանում է հայկական պատմական եկեղեցիների շնորհիվ

Պատմական Աղվանքի կենտրոն Նուխին (ներկայիս Ադրբեջանի Շաքի քաղաք), որը Ադրբեջանի երկրորդ զբոսաշրջային քաղաքն է, զարգանում է դեռևս կանգուն հայկական պատմական եկեղեցիների շնորհիվ: Աշխարհի տարբեր ծայրերից զբոսաշրջիկներին, այլ պատմական հուշարձաններ չունենալու պատճառով, այդտեղ ցուցադրում են շրջանի տարածքում գտնվող հարյուրավոր եկեղեցիները:

Այս մասին, ինչպես հաղորդում է «Արմենպրես»-ը, modern.az-ի հետ զրույցում խոստովանել է Շաքիի զբոսաշրջության տեղեկատվական կենտրոնի տնօրեն Նասիբ Իմամալիևը: «Շաքին գտնվում է Կովկասյան լեռնաշղթայի հարավային գեղատեսիլ անտառապատ ստորոտին: Բացի իր գեղեցիկ բնությունից, Շաքին օտարերկարցիներին գրավում է նաև իր բազմաթիվ պատմական հուշարձաններով, որոնց մեծ մասը քրիստոնեական եկեղեցիներն են», -կայքին ասել է Իմամալիևը:

Ադրբեջանցի պաշտոնյան նշում է, որ այդ եկեղեցիները աղվանական են՝ նույնությամբ կրկնելով Ադրբեջանի պաշտոնական շրջանակների կողմից հայկական հուշարձաններն աղվանական ներկայացնելու կեղծ տեսակետը: Պատմական փաստ է, որ Աղվանքը վաղ միջնադարից սկսած գտնվել է Հայ առաքելական եկեղեցու հոգևոր ազդեցության տակ, և այդ տարածքում կառուցված բոլոր եկեղեցիները հայկական ծագում ունեն:

Պատմական Նուխիի շրջանում ամենահին եկեղեցին Քիշ (քեշիշ՝ տերտեր բառից) գյուղի փոքրածավալէ: Այն վերանորոգվել է նորվեգական հիմնադրամի միջոցներով: Վերանորոգման ժամանակ ադրբեջանցիները վերացրել են եկեղեցու վերաբերյալ գմբեթի տակ հայատառ բոլոր գրությունները, որպեսզի թաքցնեն նրա հայկական ծագումը: Այժմ էլ արտասահմանցի զբոսաշրջիկներին այն ցուցադրում են որպես աղվանական մատուռ:

«Շաքիի ամեն անկյունում, գյուղերում կարելի է աղվանական մատուռների, եկեղեցիների հանդիպել: Քիշ գյուղի մատուռը համարվում է աշխարհի նշանավոր պատմական հուշարձաններից մեկը», -նշել է Իմամալիևը:

Նուխի քաղաքում, մինչև 1988 թվականի հայտնի իրադարձությունները, երեք հայկական և մեկ ռուսական եկեղեցիներ կային: Քաղաքում կար նաև 19-րդ դարում կառուցված մեկ սունի և մեկ շիա մզկիթ: Նուխիի շրջանի բազմաթիվ գյուղերում մինչ վերջերս պահպանվում էին հայկական հետքերը՝ եկեղեցիների, մատուռների, սրբավայրերի տեսքով, որոնց մեծ մասը կիսաքանդ վիճակում: