Խոսրով Հարությունյանը ԵՏՄ-ին Հայաստանի անդամակցումը հեռանկարային է համարում

Հայաստանի անդամակցությունը Եվրասիական տնտեսական միությանը ՀՀ տնտեսության զարգացման տեսանկյունից նոր հեռանկարներ է խոստանում: «Եվրասիական տնտեսական միությանն անդամակցելը մեր երկրի տնտեսության զարգացման տեսանկյունից նոր հեռանկարներ է խոստանում: Սակայն, ես ցանկանում եմ, որպեսզի մեր հասարակության մոտ տպավորություն չստեղծվի, թե, անդամակցելով Եվրասիական տնտեսական միությանը, մենք լուծում ենք մեր բոլոր դարդերն ու խնդիրները: Այդպիսի բան չկա: Եվրասիական տնտեսական միությունը դեռևս կայացման փուլում է, և դուք տեսնում եք, թե ինչ բարդ միջպետական հարաբերություններ են միության անդամ երկրների միջև»,- «Արմենպրես»-ի հաղորդմամբ՝ դեկտեմբերի 23-ին լրագրողների հետ հանդիպմանը նշեց Ազգային ժողովի ՀՀԿ խմբակցության պատգամավոր, ՀՀ նախկին վարչապետ Խոսրով Հարությունյանը:

Նա այդ հարաբերությունների բարդությունը նորմալ է համարում, իսկ որոշակի լարվածության առկայությունը՝ ինչ-որ տեղ օգտակար: «Եթե դու ունակ ես հաղթահարել այդ լարվածությունը, ապա քո օրգանիզմն ավելի է առողջանում: Ճգնաժամը երբեք վտանգավոր չէ, այլ վտանգավոր է ճգնաժամը հաղթահարելու ունակությունների բացակայությունը: Ավելին' եթե դու կարողանում ես հաղթահարել ճգնաժամը, բարձրանում ես դեպի ավելի առողջ տնտեսական համակարգ: Նույնն էլ Եվրասիական տնտեսական միության պարագայում է»,- ընդգծեց Հարությունյանը:

Նա խորհուրդ տվեց հայացք գցել Եվրոպական միության ձևավորման ողջ ընթացքին՝ սկսած 1956թ.-ից: «Դուք կտեսնեք, որ բավական շատ խորդուբորդներ են եղել: Հիմա Եվրասիական տնտեսական միությունն էլ նոր է ձևավորում, և բնական է, որ կլինեն խնդիրներ, որոնք պետք է հաղթահարել, իսկ թե ինչպիսին կլինի այդ միության ճակատագիրը, կախված է բոլորիցս»,- ասաց պատգամավորը:

Անդրադառնալով դիտարկմանը, թե Հայաստանը կարող էր սպասել և կայանալուց հետո նոր միանար Եվրասիական տնտեսական միությանը' Հարությունյանը նշեց, որ Ուկրաինան փորձեց սպասել, որի արդյունքը բոլորը տեսան: «Ես նաև կարող եմ ասել, որ 2014թ.-ն մեզ համար ուկրաինիցումից խուսափելու տարի էր: Ես սա լուրջ եմ ասում, որովհետև մենք չենք կարող ասել, թե մենք ինչ գին պետք է վճարեինք այդ Ձեր ասած համբերատար սպասելու համար»,- նկատեց նա:

Հարությունյանի խոսքով' ՀՀ Նախագահի' Եվրասիական տնտեսական միությանն անդամակցելու որոշումը հեռանկարային էր և հեռատես: «Սակայն, այստեղ կարևոր է ոչ միայն Եվրասիական միությանն անդամակցելու որոշումը, այլ Եվրոպական Միության հետ հարաբերությունները շարունակելու պատրաստակամությունը: Այն, որ Հանրապետության Նախագահը մասնակցեց Վիլնյուսի գագաթնաժողովին, շատ կարևոր ազդակ էր: Սա խոսում է այն մասին, որ եվրոպացիները շատ լավ հասկացել են, որ «և-և»-ի քաղաքականությունը լավագույն մոդելն է, և հիմա արդեն Հայաստանի հետ համագործակցությունը շա րունակելու ուղղությամբ քայլեր են կատարում»,- պարզաբանեց պատգամավորը:

Ըստ նրա' սեպտեմբերի 3-ի որոշումը կայացվել է ոչ թե վախի կամ շանտաժի ազդեցության տակ, ինչպես շատերն ասում են, այլ հնարավոր բացասական հետևանքները չեզոքացնելու գիտակցությամբ: «Սա է սեպտեմբերի 3-ի քաղաքական որոշմման ողջ խորհուրդը: Չփորձել գնալ մի ճանապարհով, որը կարող է քեզ համար ստեղծել դժվարություններ և սպառնալիքներ»,- համոզմունք հայտնեց Հարությունյանը:

Անդրադառնալով դիտարկմանը, թե ԵՏՄ-ն համարվում է տնտեսական միություն, սակայն շատ դեպքերում Հայաստանի անդամակցումն այդ միությանը հիմնավորվում է անվտանգության տեսանկյունից, նա ընդգծեց, որ ցանկացած տնտեսական միություն չի կարող գոյատևել առանց կայուն անվտանգության երաշխիքների: «Հետևաբար, բոլոր այն երկրները, որոնք անդամակցում են այս միությանը, մտահոգվում են իրենց անվտանգությամբ' եթե ոչ ռազմական, գոնե տնտեսական անվտանգությամբ, որն ազգային անվտանգության բաղադրիչ է: Հետևաբար, Եվրասիական տնտեսկաան միության անդամակցությունը բոլորին հետաքրքիր է նաև այս տեսանկյունից»,- եզրափակեց Խոսրով Հարությունյանը: