Կոտայքի, Արագածոտնի ու Արմավիրի կադաստրային ստորաբաժանումները միավորվեցին

ՀՀ կառավարությանն առընթեր անշարժ գույքի կադաստրի պետական կոմիտեում բացվեց նոր կազմավորված «Մարզերի միավորված» ստորաբաժանում, որում միավորվել են կոմիտեի Կոտայքի, Արագածոտնի ու Արմավիրի ստորա բաժանումները: Ինչպես հաղորդում է «Արմենպրես»-ը, ստորաբաժանման բացմանը ներկա էին ՀՀ վարչապետ Հովիկ Աբրահամյանը և ՀՀ անշարժ գույքի կադաստրի պետական կոմիտեի նախագահ Մարտին Սարգսյանը:

Սարգսյանի խոսքով՝ նորաստեղծ ստորաբաժանումը թույլ կտա էապես սահմանափակել գործառույթն իրականացնող պաշտոնատար անձ-քաղաքացի շփումը, պաշտոնատար անձի վրա ներազդելու հնարավորությունը, դրանով իսկ նպաստելով կոռուպցիոն ռիսկերի բացառմանը: «Ձեռնարկված միջոցառումների արդյունքում համակարգում ապահովվել է շուրջ 110 մլն դրամի խնայողություն, որը կուղղվի նրա հետագա զարգացմանն ու տեխնիկական նոր հնարավորությունների ստեղծմանը»,- ասաց Սարգսյանը:

Նրա տեղեկացմամբ՝ նշված տարածքային սորաբաժանումների միավորմամբ միևնույն ստորաբաժանման ներքո են ներառվել համակարգում առկա շուրջ 2 միլիոն 200 հազար անշարժ գույքի կադաստրային (արխիվային) գործերից գրեթե 650 հազար միավոր գործերի նյութեր: Դրանով հնարավորություն կընձեռվի խիստ հսկողության ապահովմամբ առավել ընդգրկուն աշխատանքներ իրականացնել համակարգում էլեկտրոնային գործառույթներ կատարելու, արխիվային նյութերի ամբողջականացման, դրանց թվայնացման ու տեսաներածման թերությունները վերացնելու ուղղությամբ:

ՀՀ վարչապետը շրջեց նորաբաց ստորաբաժանումով՝ ծանոթացավ ստեղծված աշխատանքային պայմաններին: