Կանադահայ ռեստորանատերը ծեծի է ենթարկել երիտասարդ կողոպտչին (տեսանյութ)

Տորոնտոյում հայտնի «Բարբերյան սթեյք-հաուզ» ռեստորանի տեր, ազգությամբ հայ Արոն Բարբերյանը հայտնվել է կանադական լրատվամիջոցների ուշադրության կենտրոնում այն բանից հետո, երբ նա YouTube կայքում տեսանյութեր է տեղադրել, որոնցում երևում է, թե ինչպես է ռեստորանատերը ծեծի ենթարկում իրեն կողոպտելու փորձ կատարած մի տղամարդու: Ինչպես հաղորդում է «Արմենպրես»-ը' վկայակոչելով «Ազատություն» ռադիոկայանի կայքէջը, Բարբերյանի ռեստորանի անվտանգության երկու տեսախցիկների նկարահանած նյութերում երևում է, թե ինչպես է Բարբերյանը, դրամարկղը ձեռքին, փորձում բացել ռեստորանի դուռը և մտնել ներս, երբ նրա մեջքի կողմից մոտեցած ամրակազմ տղամարդը փորձում է խլել դրամարկղը: Բարբերյանը տղամարդու սվիտերը հագցնում է վերջինիս գլխին ու ձեռքերով, ոտքերով հարվածներ հասցնելով, նրան քարշ է տալիս մայթի վրա: «Երբ նա կանգնեցրեց ինձ ու ճան կեց դրամարկղը, ես տեսա, որ նրա ձեռքում ատրճանակ չկա: Եթե զենք ունենար, ես ձեռքերս վեր էի բարձրացնելու», - պատմել է Բարբերյանը:

Տեսանյութում երևում է, թե ինչպես է կողոպտիչը, հասկանալով, որ այժմ արդեն ինքն է հայտնվել զոհի կարգավիճակում, փորձում դիմել փախուստի, մինչ Բարբերյանը փորձում է կանխել դա: Այդ պահին ռեստորանից դուրս է նետվում աշխատակիցներից մեկը, փորձում զանգահարել ոստիկանություն, այնուհետև սկսում է օգնել ռեստորանատիրոջը: «Ես չէի ուզում խփել նրան: Պարզապես ուզում էի ստիպել, որ խելոք նստի, մինչև ոստիկանները գան»,- պատմում է Բարբերյանը

Ի վերջո կողոպտիչը դիմում է փախուստի: Տեսանյութում երևում է, թե ինչպես է միջադեպի ժամանակ փողոցով անցնող մի կին, տեսնելով ռեստորանի առջև շաղ եկած թղթադրամները, սկսում հավաքել դրանք: «Այդ կինը բարի սամարացին էր: Նա հավաքել էր ողջ գումարը և հանձնեց ինձ: Մեկ այլ կին իջել է մեքենայից, տեսել իմ (ընկած) հեռախոսն ու, գողանալով այն, դիմել փոխուստի», - պատմել է Բարբերյանը: Նա հույս է հայտնել, որ ոստիկանությունը ի վերջո կբռնի իրեն կողոպտելու փորձ արած մարդուն:

Բարբերյանը այս միջադեպի մասին տեսանյութերը հրապարակել է YouTube կայքում, իսկ ռեստորանի պաշտոնական Twitter-յան էջում կատակախառն գրառում կա․ «Ահա թե ինչու չի կարելի կատակել մեր Շեֆի հետ: Խմոր հունցող Արոն Բարբերյանը կարգին հունցել է այսօր առավոտյան իրեն գողի տեղ դրած մեկին»:

«Սա հավանաբար վերջին շրջանում իմ արած ամենահիմար բանն էր՝ ընդամենը երկու հարյուր դոլարի համար կռվի մեջ մտնելը նկատի ունեմ: Բայց գոնե վերջում ծիծաղաշարժ տեսանյութ ստացվեց: Համ էլ սենսացիոն պատմություն է՝ 50 տարեկան, ճերմակած մազերով մարդը ծեծում է երիտասարդ կողոպտչին», - պատմել է հայազգի ռեստորանատերն ու ավելացնելով, թե ընկերներն իրեն կոչում են «Քիլլեր Բ», կատակել է․ «Ձեռքերդ հեռու փոքրամարմին հայից, եթե արանքում փողի խնդիր կա»: