Ոստիկանությունը մանրամասներ է հայտնել Մուսալեռ գյուղի մոտ տեղի ունեցած ավտովթարից

«Մերսեդես-Բենց» մակնիշի ավտոմեքենան դեկտեմբերի 25-ին՝ ժամը 02.00-ի սահմաններում, Երևան-Արմավիր ճանապարհի 12.5-րդ կմ-ին՝ Փարաքար գյուղի հատվածում, դուրս է եկել երթևեկելի մասից, բախվել ճանապարհի աջակողմյան հատվածում գտնվող քարե պարսպին և գլխիվայր շրջվել: Պատահարի հետևանքով ավտոմեքենայու մ գտնվող 1989թ. ծնված Սարգիս Դադուշյանը, 1991թ. ծնված Պողոս Թոսունյանը և Ստեփան Գոմցյանը տեղում մահացել են: Կատարվում է քննություն:

ՀՀ տարածքային կառավարման և արտակարգ իրավիճակների նախարարությունում դեկտեմբերի 25-ին' ժամը 02.08-ին, ահազանգ է ստացվել, որ Երևան-Էջմիածին ավտոճանապարհին՝ Մուսալեռ գյուղի մոտ, տեղի է ունեցել ՃՏՊ, կան տուժածներ. անհրաժեշտ է փրկարարների օգնությունը: Դեպքի վայր էր մեկնել երկու մարտական հաշվարկ: Պարզվել էր, որ Մ-5 միջպետական ավտոճանապարհի Երևան-Էջմիածին հատվածի 12-րդ կմ-ում «Մերսեդես» մակնիշի 34 DZ 281 պ/հ ավտոմեքենան դուրս է եկել ավտոճանապարհի երթևեկելի հատվածից և հարվածել հանդիպակած պատին:

Մինչ հրշեջ-փրկարարների կանչի վայր հասնելը, տեղի ուժերով ավտոմեքենայից դուրս էին բերվել անձը չպարզված 3 քաղաքացի, որոնցից 2-ը տեղում մահացել են, իսկ երրորդը՝ հոսպիտալացման ճանապարհին: Փրկարարները հոսանքազրկել են ավտոմեքենան, փակել գազի փականը և սահմանազատել տարածքը: