Ալիևը երազում է նամազ անել Հայաստանի պարսկական մզկիթներում

Ադրբեջանի առաջնորդ կրտսեր Ալիևը իր հոր' Ալիև ավագի անունով «Հեյդար» կոչված մզկիթ է հիմնել Բաքվում: Այդտեղ նամազից հետո նա հայտարարել է, որ ցանկանում է նամազ անել նաև Շուշիի և Երևանի պարսկական մզկիթներում: Այս մասին, ինչպես հաղորդում է «Արմենպրես»-ը, հայտնում են ադրբեջանական ԶԼՄ-ները:

«Հեյդարացված» Ադրբեջանի առաջնորդը հոր անվան մզկիթի (երևի Իլհամը ԽՍՀՄ-ի ԿԳԲ-ի նախկին աշխատակից Հեյդարին արդեն դասել է մահմեդական սրբերի շարքը) բացման արարողության ժամանակ արդեն 20 տարի կրկնած մի քանի այլ երազանքներ էլ է արտահայտել: Օրինակ' նա ասել է, որ երազում է «վերադարձնել» Ղարաբաղը, երազում է, որ «ադրբեջանցիներ բնակվեն ոչ միայն Ղարաբաղում, այլ նաև Երևանում, Գեյչայում (երևի նկատի ունի Գավառը), Զանգեզուրում»: Նա ասել է, որ իր երազանքն իրականացնել թույլ է տալիս «ուժեղ ադրբեջանական բանակը, տնտեսությունը», իր «միջազգային դիրքը»:

«Այդ պատճառով մենք պետք է աշխատենք, ավելի ակտիվ չարչարվենք, յուրաքանչյուր քաղաքացի պետք է իր տեղում ներդրում կատարի ընդհանուր գործի մեջ: Վստահ եմ, որ կգա օրը, և մենք միասին նամազ կանենք Շուշիի մզկիթում»,- երազել է նա:

Դե ինչ, երազել միշտ էլ կարելի է: Բայց, ինչքան կարելի է Ադրբեջանի «համազգային առաջնորդի» զավակին թողնել երազել: Ուստի, նա կարող է որպես զբոսաշրջիկ այցելել Շուշի և Երևան ու ինչքան ուզում է նամազ անել պարսկական մզկիթներում, որոնք, ի տարբերություն Ադրբեջանում ավերված կամ «ալբանացված» բոլոր հայկական եկեղեցիների և Բաքվում գրադարանի վերածված հայկական եկեղեցու, պահպանվում և գործում են որպես մզկիթ:

Ինչ մնում է «ուժեղ ադրբեջանական բանակին», ապա նրա «ուժեղությունը» և՛ ադրբեջանական ժողովուրդը, և՛ միջազգային հանրությունը տեսան ղարաբաղյան բանակի դիրքապահների վրա այդ «բանակի» օգոստոսյան դիվերսիաների և արտագրոհների ժամանակ, երբ այդ «ուժեղ բանակը» խայտառակ պարտություն կրեց և, մեծ կորուստներ տալով, հետ շպրտվեց ու մինչ օրս դեռ ուշքի չի եկել: Տեսան նաև թիկունքից խոցված ուսումնավարժական անզեն հայկական ուղղաթիռի անձնակազմի մարմինները դեպքի վայրից կայծակնային հատուկ գործողությամբ դուրս բերելու ժամանակ, երբ իրենք էլ չհասկացան, թե ինչ և ինչպես տեղի ունեցավ: Տեսնում են նաև ամեն օր, թե ինչպես է Լեռնային Ղարաբաղի Հանրապետության պաշտպանական բանակն արժանի պատասխան տալիս իրենց կեղտոտ արտագրոհներին: